Молитвы о всяком прошении. Том 2

Аллилуйя!

Сей кондак глаголи трижды, затем икос 1 и кондак 1. Молитва перед иконой Божией Матери «Домостроительница»

О, Всемилостивая Владычице, Мати Господа нашего, во всех бедах и скорбях наших Милостивая нам Сострадательнице, о всех грешных Предстательнице, всех молений наших усердная Скоропослушнице, о всяком деле блазе надежная наша Ходатаице, всякого доброго начиная благоуспешная во всем Устроительнице, жития и спасения христиан Всемилостивая Домостроительнице!

Призри милостивно ныне на нас, грешных раб Твоих, перед честной иконой Твоей предстоящих и с умиленной просьбой к тебе вопиющих. Не возгнушайся нас, скверных, но милостивно моления наши прими и к престолу Сына Твоего Христа Бога нашего принеси.

Буди о всех прошениях наших Молебнице теплая, о самых грешных и всеми отверженных верная к всех Владыце Предстательнице, всякого доброго начинания твердая во всем Управительнице и во всем жития нашего ко спасению Добрая Домостроительнице!

Буди Милостивой Устроительницей душ наших и ко спасению нашему надежной Путеводительницей и милостивой Домостроительницей земного, а наипаче небесного жития нашего, да все скорби жития нашего к славе Сына Твоего и Бога и вечному спасению нашему обращены да будут, да тако, бурное море жития сего без порока прешед, достигнем вечного Дома нашего – Царствия Сына Твоего и Бога и восславим Его неизреченное милосердие и Твое всемилостивое к нам грешным предстательство со всеми святыми во веки веков. Аминь.

Канон о вразумлении, совмещённый с акафистом «Подательница ума»

Канон о вразумлении

Иже во всяком недоумении и душевном обстоянии читаемый

Глубоко есть сердце (человеку) паче всех, (и человек есть), и кто познает его, кроме Господа, вся Сотворшего и Ведущего тайныя сердец помышления?

Бога никтоже никогда же виде. Сына Своего Единородного, Иже от Отца, Того дал есть нам, да нас спасет, и от вечныя смерти избавит, и новый смысл жития да подаст нам, иже есть любы Божия.

Аще друг друга любим, Бог в нас пребывает, и любы его совершенна есть в нас. Аще не имеем любви, не имеем Бога. О сем разумеем, яко в Нем пребываем, и Той есть в нас, аще от Духа Своего дал есть нам, и любы Его в нас, с нейже Премудрость и сила Божия.

Песнь 1

Яко по суху пешешествовав Израиль, по бездне стопами, гонителя фараона видя потопляема, да вразумится пети победную песнь, от всея разума и души своея вопияше:

Помилуй мя, Господи Иисусе, и просвети Духом Твоим Святым

Ныне приступих аз грешный и обремененный к Тебе, Владыке и Богу моему, не смею же взирати на небо, якоже древний Израиль, мысленным фараоном одержим, но избави мя от оного обстояния, укрощая бурю злых нападений его и просвети меня светом разума Твоего, да научуся творити волю Твою.

Помилуй мя, Господи Иисусе, и просвети Духом Твоим Святым

Ныне бурею злых обстояний одержим, погружаюся в волны жития моего, яко гадами, скверными помыслами левиафана мира сего кишащее, но Ты, Спасителю мой, избави мя от сих и подаждь ми руку, яко Петрови, да радостно зову Ти:

Слава: Безумне, окаянне человече, сон лености души Твоея воистину ти вечную муку ходатайствует, но обратися ко Господу Богу, да вразумит, просветит и помилует тя и наставит Истиною Своею на Путь вечен.

И ныне: Мати Божия Преблагословенная, Премудрость и Силу Божию породившая, ныне избави мя от фараона мысленного, и на Путь Истины настави мя, Иже есть Сын Твой и Бог мой.

Песнь 3

Несть свят и праведен паче Тебе, Господи, Премудрости и смыслов Подателю, Ты меня утверди в разуме Твоем, Человеколюбче, да Премудростию и славою Твоею да обогащуся, да просвещуся, да вразумлюся, и утвержуся на камени исповедания Твоего, иже есть имя Твое Святое, кое благословенно еси во веки. Помилуй мя, Господи Иисусе, и просвети Духом Твоим Святым

Ныне в недоумении моем прибегаю к Тебе, Господи Боже и Спасе мой, Ты бо еси Альфа и Омега, конец и начало всего, Тобою движемся, живем и существуем, да научиши меня творити волю Твою.

Помилуй мя, Господи Иисусе, и просвети Духом Твоим Святым

Яко народ Твой в пустыни, Господи, блуждает род людской прелюбодейный в житии сем, не могущи разумети войти в покой Твой, Ты же Сам мя на Путь Истины настави, и напитай меня, гладом духовным томимого, не манной, но Телом и Кровию Твоею, да вопию Ти:

Слава: Да вразумлюся и просвещуся и спасуся и научуся творити волю Твою, и поклонятися Единому Божеству Твоему, бегая златого тельца – бога века сего обольщения.

И ныне: Мати Божия Пречистая, Преблагословенная Приснодева Богородице, Ты мя от всякия прелести вражия избави, да не отпаду от воли Сына Твоего, Иже Един есть Путь, Истина и Жизнь, Премудрость и Сила Божия.

Тропари:

Ангеле Божий, Хранителю мой святый, светом Света Сотворшего нас просвети душу мою, да твоею молитвою Премудростью Его обогащуся.

Слава: Силы Небесныя, служители Небесныя

Славы и Престола Премудрости Его, пророки, Апостолы и Святители, преподобные и мученики, все святии, от века Богу угодившии и светом разума Его просвещенные, молите Премудрости Того и нам приобщитеся.

И ныне: Мати Божия Пречистая, Неописанное Бога Слово на спасение наше родившая и в снедь верным Сына Своего даровавшая, сподоби нас грешных верно Тому служити, к небесем привлаченный к земле разум наш устремляя.

Песнь 4

Христос моя сила, Бог и Господь, честная Церковь боголепно поет, взывающи от смысла чиста, о Господе празднующи, Премудрости и смыслов всех Славном Подателе, тлителя смыслов работу вовек Упразднившего и новый смысл жития нам Несущего. Помилуй мя, Господи Иисусе, и просвети Духом Твоим Святым

Страстей мя смущают прилози, Господи, и помрачают ум мой, темже мрачный дракон отвращает от Тебя душу мою, Бога и Создателя моего, ищущи погубити ю, Ты же избави мя от лукавого его ловления, и даждь ми разум творити волю Твою.

Помилуй мя, Господи Иисусе, и просвети Духом Твоим Святым

О, горе мне! Яко народ твой в пустыни, умом помрачаюся, и злыми помыслами разума моего обольщаюся, и в злой похоти свободной воли моея укореняюся, не разумея творити всеблагую волю Твою, Бога Творца и Спасителя моего.

Помилуй мя, Господи Иисусе, и просвети Духом Твоим Святым

Слава: Горе блудящим окольными путями суемудрия по злым похотям века сего, иже есть похоть плоти, похоть очес и гордость житейская, Ты же, Спасе, от тех мя ловления избави, охраняя душу мою смиренномудрием.

И ныне: Премудрость и Любовь Божию плотию породившая, и на камени Рождества Твоего нас утвердившая, в любви Сына Твоего нас утверди, о, Дева Всенепорочная, да будет Он в нас и мы в Нем вовеки пребудем.

Песнь 5

Просвети нас повелениями Твоими, Господи, и Премудростью Сотворшего нас Сына Твоего разум Твой подаждь нам, да просветимся Светом Твоим, Человеколюбче, и творити волю Твою да потщимся, да в Тебе и Сыне Твоем едино Тело церковное да пребудем. Помилуй мя, Господи Иисусе, и просвети Духом Твоим Святым

Враг попирает, и озлобляет, и ослепляет мя, и наставляет всегда творити своя хотения, помрачая ум злыми помыслы и нелепыми, тщася отвратити мя от Создателя моего и приобщити скверной державе безумия своего, Ты же, Боже мой, избави от того мя ловления, да ничтоже во мне приобрящет.

Помилуй мя, Господи Иисусе, и просвети Духом Твоим Святым

Враг яко лев рыкает в пустыне жития сего, ища, кого поглотити, устрашая нас, надеясь уязвити грязными похотями скверного ума своего, и от Творца всех отвратити, Ты же, Любоблаже, избави мя тех нападения, просвещая душу мою светом разума Твоего.

Помилуй мя, Господи Иисусе, и просвети Духом Твоим Святым

Слава: Се, Господи, Ты засеял поле жития нашего чистым житом Хлеба Животного – святого Евангелия Твоего, враг же всея на нем плевелы сынов лукавого века сего учения. Ты же от тех обольщения нас избави.

И ныне: Богородице, Всесильная христианом Помощнице, Домом Премудрости Божией ставшая и Премудрости и смыслов Подателя Рождеством Своим даровавшая, просвети ослепленный разум мой Телом и Кровию Тобой Рожденного.

Песнь 6

Житейское море, воздвизаемое зря напастей бурею, ныне вопию Ти, Создателю моему: возведи от тли безумия живот мой, и к разуму небесному мя направи, Иже един есть на потребу. Помилуй мя, Господи Иисусе, и просвети Духом Твоим Святым

Враг обольщает мя, яко народ израильский в пустыни, и отвращает от воли Творца моего, иже благая, угодная и совершенная, научая искати лукавых путей его, ублажая похоть плоти, похоть очес и гордость житейскую. Ты же Премудростью Своею хитрость его обличи, научая Единому Тебе угождати, да избегну проклятых сетей его обольщения.

Помилуй мя, Господи Иисусе, и просвети Духом Твоим Святым

Враг отвращает нас от воли Твоея, Владыко, яко прародителей наших, хитрыми глаголами своими: «будете яко бози», лукавыми ловлениями века сего ищущи уловити нетвердую душу мою, иже суть прилоги снисхождения к смертной державе -страшной бездне его обольщения, ты же тех обличи, и на Путь Истины мя направи.

Помилуй мя, Господи Иисусе, и просвети Духом Твоим Святым

Слава: Кто яко Бог наш, Иже Един есть Верен, Праведен и Милосерд, и Заступник Всесильный всем уповающим на Него, праведных тех ликов творящих причастников ради милости Своея всебогатыя.

И ныне: Премудрости Подателя Рождшая, моли благость Того научити нас присно познавати и творити волю Его и Тому Единому всегда благоугождати, иже едино есть на потребу, да все остальное поистине приложится нам по слову Его, и да никакоже в уповании на Него посрамимся.

Икос

Господи Иисусе, Творче наш и Создателю, премудрости и смыслов Подателю, просвети разум мой и укрепи растленную волю мою в делании заповедей Твоих, иже есть Путь в Жизнь вечную.

Песнь 7

Премудрыя отроки иудейския, от злочестивого царя, в безумии своем добровольно утвердившагося, укорение приявшии, по сем в огненную пещь вверженныя, никакоже от нея потерпевшии, на паки от Бога умудренныя и прославленнии, молите Всеблагого Владыку избавитися нам огненного искушения. Помилуй мя, Господи Иисусе, и просвети Духом Твоим Святым

Яко в пещь огненную, в пучину страстей моих погружаюся, злыми помыслами растленного ума моего и вечного врага распаляюся, иже суть ступени в геенну огненную, Ты же, Владыка Всесильне, от страшной мя сей бездны избави.

Помилуй мя, Господи Иисусе, и просвети Духом Твоим Святым

Да просвещуся, и вразумлюся, и спасуся, и в разуме Христовом вовек утвержуся, Иже Един есть Спаситель мой, Дверь и Путь в Жизнь вечную.

Помилуй мя, Господи Иисусе, и просвети Духом Твоим Святым

Слава: Вразумися, окаянная душе моя, творити Божия повеления, и бегати мерзких детей врага твоего вечного, иже влекут нас оскорбляти Владыку поступками студными.

И ныне: Дщи вавилоня окаянная блазнит мя своими младенцами, ища уловити окаянную душу мою лукавыми помыслами и срамными деяниями, Ты же Владычице, истощи я до основания, вразумляя мя разбивать тех о Камень Тобою Рожденного, Иже есть Сын Твой и Бог мой.

Песнь 8

Из пламени росу преподобным источил еси и праведного жертву водою попалили еси: вся бо твориши, Христе, токмо еже хотети, да видим велия чудеса Твоя, и вразумимся, и потщимся с любовью и страхом познавати волю Твою, иже есть благая, угодная и совершенная, темже Тя превозносим во вся веки. Помилуй мя, Господи Иисусе, и просвети Духом Твоим Святым

Многия милости любящим закон Твой, Господи, в нем же вся потребная человеку суть, и творящим заповеди Твоя нет соблазна, начало же премудрости – страх Господень, иже поучает во всем искати волю Твою, не имеющий же его не может оправдаться, блуждая помыслами в бесплодной пустыни жития сего, не разумея припасти к Тебе, Каменю Крепкому, источающему источники неисчерпаемыя воды живой.

Помилуй мя, Господи Иисусе, и просвети Духом Твоим Святым

Мудрецы суетного самонадеянного века сего надмеваются, полагаяся на учения странныя измышления человеческого и на плотский разум свой, тщатся спростретися умом к разумению сокровенных судеб Твоих, Господи, не разумевая, что знание надмевает, а любовь назидает, но аще кто любит Тебя, Господи, тому дано знание от Тебя – разумети, любити и творити закон Твой и святую волю Твою.

Слава: О, горе мне грешному! Не разумею воли Твоея, Господи, иже благая и совершенная, не сознаю сокровенных судеб Твоих, Бога и Спасителя моего, и аще праведник сих не разумеет, и едва спасен будет, что делать мне, окаянному? Ты же меня от сего пагубного неведения избави и Сам настави творити волю Твою.

И ныне: Гора Тучная, Гора Усыренная, Несекомый Камень на спасение нам даровавшая, умоли Иже из Тебе Рожденного, да не раздавит мене окаянного по грехом моим, но Сам во главу жития моего да станет, и напитает Телом и Кровью Своими, Иже едино есть на потребу, к сим же и прочия блага нам да приложит, источая их из утробы безмерного милосердия Своего, яко и народу своему избранному из камени неплодного в пустыни.

Песнь 9

Бога человекам невозможно видети, на Негоже не смеют чины Ангельстии взирати, Тобою же, Всечистая, явися человекам Слово Воплощенно, да словесами вечныя жизни напитает нас, наипаче Телом и Кровию Своими, по сих Духа Своего ниспошлет, Иже от Отца к верным исходит. Помилуй мя, Господи Иисусе, и просвети Духом Твоим Святым

Ныне к вам прибегаю, Ангелы и Архангелы, служители Божественныя Славы и человеков наставницы, приданныя нам от святого крещения для вразумления ко спасению, молите Человеколюбца Бога просветитися нам в разум Его.

Помилуй мя, Господи Иисусе, и просвети Духом Твоим Святым

К вашему ходатайству притекаю, пророки и апостолы, исповедницы и учителя христианския, Христовы заповеди своей жизнью сохранившии и нас тому научающии, молите Владыку Христа и нам сохранитися в блаженной пажити словесных овец Его.

Слава: Ныне к вам простираю руки свои, славныя Христовы мученицы, кровьми своими премудро верность свою Премудрости Божией запечатлевшии, блаженныя исповедницы, безумием мнимым безумный сей мир обличившии, молитвенницы, праведницы, Христова светлого учения наставницы, молите и нам сохранитися в блаженном ведении святых заповедей его.

И ныне: Мати Божия Пречистая, Премудрость Божию породившая и Того верным в снедь даровавшая, сподоби меня всегда искренне Того приобщатися и сохранятися в блаженном творении святых заповедей Его, иже есть жизнь вечная.

Аще хочеши, твори сию молитву:

Молитва о вразумлении всем святым

Святый Ангеле Божий, хранитель и просветитель окаянной души моей и помраченного ума моего, светом Света Сотворшего нас просвети душу мою и к разумению воли Того направи, да будет воля Господа Творца нашего во всех делах и помышлениях моих, да проведу остаток жизни моей в благоугождении Творца всяческих, смысл жития моего в том полагая.

Склони на молитву о мне, недостойном и грешном, все Силы Небесныя, у Престола Божия предстоящии, ты же с ними достойно предстоиши, да молят Бога за душу мою окаянную – просветити тьму мою. Склони на молитву о мне недостойном и грешном всех Ангелов – Хранителей рабов Божиих, мною поминаемых, всех близких и знаемых моих, всех любящих и благотворящих нам, всех ненавидящих и обидящих нас, да молят милость Божия о нас просветитися нам светом любви Христовой.

И вы, все Силы Небесныя, иже молите милость Божию о падшем роде людском, склоните благость Его к нам недостойным и грешным, да просветит души наша и наставит творити волю Его, в творении той, всеблагой и всесовершенной, смысл жития нашего полагая, да не отпадем от милости Сотворшего нас, яко прародители наши, но паки в той утвердимся, полагая жизнь нашу за Истину, Иже есть Господь наш Иисус Христос и за други наша, по непреложному слову Того: «нет выше той любви, иже кто душу свою положит за други своя».

Научите нас огребатися от плотских похотей растленных души и воли нашея, иже застят в поврежденном разуме нашем Истину Любви Сотворшего нас и Отдавшего за нас Сына Своего Единородного, научая творити волю врага нашего, ищущего уловити нас в погибели державу свою. Да не будет творитися воля того, но воля Творца нашего, во всем благая и совершенная.

И Ты, Крестителю Христов, всех святых начальниче и покаяния премудрый наставниче, моли Христа Бога нашего, Его же Главы коснулся еси в водах иорданских, да омоет душу мою слезами покаяния и на путь покаяния течение жития моего да направит.

И вы, святые апостолы, ближнии друзи Христовы, учениями Благого Учителя своего всю вселенную просветившии и Свет разума Христова нам даровавшии, молите благость Его и нам света Того приобщитеся, тьму неведения нашего просвещая.

И вы, праведники ветхозаветныя, пророк Моисей, приявший заповеди Творца нашего, и прочия пророки, приход Мессии в мир возвестившии и веру во Единого Бога в падшем сем мире соблюдшии, молите Владыку и нам просветитися в заповедях Господних и волю Его творити.

И ты, Премудрый царь Соломон, моливший Бога просветити разум твой Премудростью Своею и паче всех человек превзошедший в познании Премудрости и воли Божией, моли Того и нам просветитися Духом Его Святым, да верными сынами Премудрости по благому примеру твоему да будем.

И вы, святые учителя христианские, добрые пастыри наши, светом учения христианского падший сей мир просветившии, молите Благого Учителя нашего и нам в разуме Христовом просвещение Истиной даровати.

И вы, святии Христовы мученицы, кровью своею верность Христу премудро запечатлевшии и в Премудрость и Радость Господа нашего вшедшии, молите и нам того Премудрости Того приобщитеся.

И вы, все святии Земли Российской, души своя во основание земного Отечества нашего яко преддверие Отечества Небесного премудро положившии, яко единением Великия, Малыя и Белыя Руси всех Творец и Создатель единство Нераздельной Единосущной Пресвятыя Троицы премудро всем нам явил еси, да и мы по премудрому примеру вашему святыми вашими молитвами верными служителями Премудрости Божией сподобитеся да станем.

И вы, все святии, житием своим, а наипаче кончиной своей премудро Творцу и Создателю всех угодившии и ныне на небесех Престолу Того предстоящии и неисследуемого света Премудрости Того наслаждающиеся, сподобитеся и нам молитвами вашими Премудрости Его приобщитеся, да ваших молитв радии мы верными сынами Премудрости Божией да станем и причастниками благодати сей премудро в житии сем приобщившися, сподобимся вместе с вами той наслаждатися в невечернем свете Царствия Божия во веки веков. Аминь.

Аще желаеши, твори и сию молитву:

Молитва Господу о вразумлении

Помилуй мя, Господи, и просвети Духом Твоим Святым, да буду разумети и творити угодное Тебе и бегати вредного и ненужного.

Научи меня, Господи, доверять Тебе и во всем полагатися на Святую волю Твою, а не на суетные измышления ума моего!

Аще желаеши, чти молитву царя Соломона о снисхождении Премудрости (Прем 9).

АКАФИСТ Богородице ради иконы Ея «Подательница ума»

Кондак 1

Избранней от рода человеческого на спасение наше в Матерь воплотившегося от Духа Свята Иже от Отца Рожденного прежде всех век Премудрости Божией – Царя Славы Христа Бога нашего, похвальная восписуем Ти, Владычице нашей, раби Твои, Богородице. Ты же, Мати Премудрости Божия, Плотию Родившая Неописанное Божие Слово на спасение наше, от всяких нас бед свободи и ко спасению вразуми, да зовем Ти:

Радуйся, Всемилостивая Подательнице ума, наша Добрая Вразумительнице!

Икос 1

Ангел предстатель с небесе послан бысть рещи Богородице: радуйся, и от Духа Свята воплощаема Тя разумевая, Господи, ужасашеся и стояше, зовый к Ней таковая:

Радуйся, Премудрости Божией вместилище!

Радуйся, благодати Духа Святаго приятелище!

Радуйся, Бога Слова Плоти всемилостивое созидание!

Радуйся, Премудрости Божией отпавшим тоя подаяние!

Радуйся, преданным смерти Жизни Подателя рождшая!

Радуйся, в ад осужденным Своим Рождеством Путь на небо открывшая!

Радуйся, в злых обстояниях Всесильная наша Спасительнице!

Радуйся, в неудобопонимаемых обстояниях Всемилостивая Вразумительнице!

Радуйся, суетной мудрости века сего, иже буйство есть перед Богом, Премудрая Обличительнице!

Радуйся, демонами прельщенных от козней их злых Свободительнице!

Радуйся, против плоти, мира и дьявола брань ведущим Милостивая Защитительнице!

Радуйся, разума Христова просящим независтная его от Бога Подательнице!

Радуйся, Всемилостивая Подательнице ума, наша Добрая Вразумительнице!

Кондак 2

Видящи благочествыя люди земли Италийския дом Богородичен, идеже Пресвятая Дева родися, потщася принести дом той в страну свою во град Лорето, да покров Ея всемилостивый обрящут, радостно Богу зовя:

Аллилуйя!

Икос 2

Разум недоразумеваемый разумети ищущи, Премудрости Богомати, благочестивыя люди града Лорето потщася соорудити Ти икону, от древа сотворену, иже буде всем верным в образ Твой и Рожденной Тобой Премудрости и Силы Божией – Христа Бога нашего, превосходящей всякий разум человеческий. Мы же им подражая, Премудрости Твоея просим и сего ради зовем Ти сице:

Радуйся, Премудрости Божьей Родительнице!

Радуйся, Тоя земнородным Подательнице!

Радуйся, разума Христова ищущих усердная Взыскательнице!

Радуйся, требующим ума Христова Добрая Вразумительнице!

Радуйся, ослепленных учениями суетного века сего ко Христу приведение!

Радуйся, нищим духом даров Духа Святого всемилостивое излияние!

Радуйся, вселукавые ухищрения врага простотою Своей обличающая!

Радуйся, врагов рода человеческого Силою Рожденного Тобой Тобой запинающая!

Радуйся, плотския недоразумения Премудростью Сына Твоего обличающая!

Радуйся, всех верных в Истине Рождества Твоего просвещающая!

Радуйся, милости Божией отпавших с Создателем всех примирение!

Радуйся, Премудрости Божией обуянным страстями последних времен подаяние!

Радуйся, Всемилостивая Подательнице ума, наша Добрая Вразумительнице!

Кондак 3

Сила Вышнего осени к зачатию Браконеискусную и Дух Святый найде на Тя, Всенепорочная, да зачнеши по плоти Премудрость и Силу Божию, Христа Бога нашего, Ему же о Тебе всегда поем сице:

Аллилуйя!

Икос 3

Имуще Богоприятную Дева утробу, Премудростию Своею превосходящая премудрость небес, в ней же изволи воплотитися на спасение наше премудрости и смыслов Податель, да всех Премудрости Божией ищущих Тобою Себе приобрящет. Сего ради вопием к Богородице:

Радуйся, Премудростию Своею превосходящая Премудрость небес!

Радуйся, Бога Слово на спасение наше плотью родившая!

Радуйся, нам на освящение Его даровавшая!

Радуйся, Премудрости Божией нас приобщившая!

Радуйся, Рождеством Своим мир освятившая!

Радуйся, клеще огнезрачная, угль Божества неопально в Себе воплотившая!

Радуйся, в снедь верным Сына Своего подарившая!