Бұл кітап — қазақ халқының басынан өткен ең ауыр тарихи кезеңдердің — 1932 жылғы ашаршылықтың, 1937 және 1944 жылдардағы депортация толқындары мен Ұлы Отан соғысы тұсындағы жүрек тебірентерлік көріністердің куәсі.
Шығарманың орталық өзегі — Жарқын мен Айғанымның қарапайым отбасының өмірі арқылы өрілген терең психологизм мен адамгершілік ұстанымдары. Ажал мен аштықтың құшағында отырып та адамдық кейпін жоғалтпаған, тағдыр тәлкегімен жат жерден айдалып келген кәріс, шешен, неміс, түрік, украин және орыс бауырларын жатсынбай, соңғы үзім нанын бөліп берген қазақ халқының ұлы мейірімі мен қайсар рухы баяндалады.
Кітап соңында сол зұлмат жылдардың тірі куәгерлері мен танымал тұлғалардың қазақ халқына айтқан шынайы тарихи алғыстары берілген. Бұл еңбек — ұрпақтан-ұрпаққа жететін мейірім мен бірліктің мәңгілік шежіресі.





