Ром. На цыганском языке (диалект русска рома)

– Нат, Насте. Тэ лодав мэ на лава уже никэдэ. Ада сарэса ваврэс. А кэ другэндэ, савэ мулэ и джидэ – тэрдёл. Кокоро на джинав состыр.

– А мэ джинав. Состыр ту лыян, со сарэса пхуро? Ту со, тэ мэрэс скэдэспэ?

– Состыр ту лыян?

– Ада ангил концо мануша взрипирэн пэскиро джиибэ. Взрипирэн, и лэнпэс тэ родэн пэскирэн другэн.

– Нанэ пхуро, нэ и нанэ тэрно.

– А вот мэ, дылыны, тут гинав тэрнэса.

– Наис, Настя.

Пал ванта сыс тихэс, а палэ ёй кашукэс пхэндя:

– На чейно мангэ тыро «наис».

Неужели ёв дякэ и на полэл, со ёй камэл лэстыр? Или шунэл ла, ракирэл ласа, а думинэл пэскиро. А ёй ракирэл пал пэскиро. Нэ, сыр можно тэ на полэс, кэдэ саро дыкхно?

– Иногда сыкадёлпэ, со ту явьян адарик насовсем. А подыкхэса прэ тутэ – дасаво же приблудно папин дрэ стаи, каждо минута можешь тэ г’аздэспэ и тэ урняс. Со ту кокоро пал дава думинэс?

– Собы тэ пхэнав, Настя, чейно времё.

– И скицик тукэ чейно времё?

– Ада мэ не могу тэ пхэнав.

– Фэдыр бы ту на явьян адарик.

– Состыр, Настя?

– Тукэ куч. Явьян, подживдян, и утрадыян. А кэ вавир, кон присыклыя кэ ту, нанэ рэндо.

Лэскири глос покорно пхэндя:

– Куч, Насте, мэ могу кана же тэ утрадав.

– Карик?

– Карик – нибудь.

– Значит, тукэ ужэ на камэнпэ дасавэ штэты?

– Нат, лаче штэты.

– Или мануша?

– Сыр ту ко мануша, адякэ же и ёнэ кэ ту.

– Тэ традэс – просто.  Думинэс, мангэ просто  терпеть  ромэндыр? Некотора рома уже дро якха на дыкхэн. Ракирэн, со пал пэскири выгода дай дрэ рой утопить могу. А сави мангэ выгода, сави?! Сыс, со мангэ камаваспэ тэ закэрэс якха и тэ прастас дро форо, и тэ дживав одой, сыр сарэ мануша дживэн. Нэ, не могу. Мангэ чаворэн жалко тэ чюрдав. И ромэнгирэн, и гадженгирэн. Мэ присыклыём кэ ёнэ. Ко Шелоро только дошкольникэн шов. Дуйен лэл пэса, кэдэ традэл прэ промыслы. А ещё штар клубятся кэдэ ёнэ кхэрэ, бокхалэ, мэлалэ. Приджялпэ тэ ратькирэн дрэ чаворэнгиро садико тэ ачавав, и кокорякэ тэ ачавпэ. А адай главно бухгалтеро конезавода кошэлпэ. Кэ амэ, ракирэл, нанэ круглосуточно интернато прэ государственно зрикирибэ. А со тэ кэрэс лэнца, если дасавэ родители?

– Ту, Настя, славно. Ту прэ мандэ, пожалуйста, на холясовпэ.

– Прэ со мангэ тэ холясовав, Будулаё?

– Пал адава, со прокуророса тут кхарав.

– Ада же чячипэ. Тэрдёв, проджява заочно юридическо, и лава пэскирэн же ромэн пал лодыпэ тэ сэндякирав. Тогда и ту ракхпэ мандыр, Будулаё.

А хуланы храпинэл прэ саро кхэр. И пхурдыня традэн мимо. Лыджян силосно масса. Только иногда зачидян фаратыр фэнштра, сыр панеса.

Са – таки, додужэкирдяпэ лэстыр лава: «– Ту, Настя, славно». Нат, куч, со Клавдия на роспхэндя Ваняскэ саро. Если бы на урикирдя пэс, роспхэндя, то неизвестно, со бы кана сыс. Куч, со лэс на сыс кхэрэ, со сыс пало Доно. Нюра, встревоженно, успокаивала ла. Невольно затходя тэ роспхэнэл лакэ саро. Если Нюра дякэ ко ило прилыя нэвипэ, со Ваня лакэ нанэ родно пшал, то со бы скэрдяпэ Ваняса, кэдэ уджиндя? Нюра, годьвари, уракирдя тэ на ракирэл лэскэ. «– А одой явэла дыкхно, дае». И Ваня спокойнэс традыя тэ сдэл экзамены. Дро хуторо никон ничи на джинэн. Только дивиндлэпэс, со Будулаё дякэ сыгэс утрадыя. Думинэн, родно рат покхардя кэ пэскирэ. Если бы кон уджиндя, со ёв утрадыя пэскирэндыр чаворэндыр, собы пхэндлэ пал о рат, саво кхарэл? И Лущилиха, сыр паны дро муй лыя, хотя и пученас джювля, палсо ёв сыс кэ ёй дро кхэр. «– Лэс и спученти. Кэ мэ загэя миро вино тэ кинэл». И латыр отгэнэ. Нэ кана и кэ Клавдя якха на сыкавэл. Сыр удыкхтя – зрискирэла дрэ перво калитка. Никон ничи на джинэл, и не должен тэ джинэл. Годьвари, Нюра.

– Нэ куч. Мэ выпьява туса. Чив мангэ, Будулаё. А то камэс, традаса туса дрэ фэлда.

– Палсо?

– Мэ адай джинав штэто. Ягори розлыджяса. Мэ романэ гиля сбагава тукэ. Камэс – скхэлава тукэ. Ваш тукэ екхджинэскэ. Камэс?

Эна, «ягори» по-ихнему «костёр». Эна, можно пал саро джиибэ дякэ и тэ на уджинэс лав, савэстыр зависит дриван бут. Надеется, значит, если на выгэя адай лавэнца тэ пришутькирэл, выджяла паш романы яг. Думинэл, адай помогут гиля, кхэлыбэ, фэлда. Рома испокон веков фэлдытка мануша. Саро лэндэ дрэ фэлда. И биянэн дрэ фэлда, и камэн, и мэрэн одой. Адай сыго екх екхэс полэна. Эх, и хитро же ёй, хоть и тэрны сарэса. И лав саво – то, «ягори», впивается дро ило. Адай ни екх лав романэс на джинэс… А хуланы сыр пулемёто храпинэл, и пхурдыня традэн мимо. Ш-ш-арк… и уже на шундло.

– Уже сарэса поздно, Насте. Нэ если ту камэс, авэн, традаса.

– Ту бы отрисияпэ прэ минутка, мэ переурьявапэ. Не могу же мэ тэ кхэлав дро холова пашэ ягори.

Пал перегородка зашелестело. Щёлкнул выключателё. Тихэс откэрдэ и закэрдэ порта. Ярко захачияпэ фара. Треско мотоциклостыр. Утрадынэ. И тишина.

– Ту со ворочаешься? Должно, мири квартирантка пэскирэса Будулаёса росджянгадэ. Гудинэн и гудинэн пал ванта.

Акэ нэвипэ! Пхури на сыс суты! Г’ара на суты, или нат?

– Нат, баба. Душно просто адай.

– А мэ тэл ватно одеяло замразыём. Ада тутэ рат хачкирдо. Может, тукэ шылоло компото вытэрдава погребостыр?

– Наис, баба, мэ на камам.

– «Наис», «наис»… мэ на джинав, со ту камэс. Сов уже. Кана жыко рассвето на рискирлапэ. Жыко рассвето лэла лэскэ тэ багал, тэ кхэлэл. И со ёй дрэ лэстэ латхтя? Екх брода – дар! Эна со значит ромны. Сов уже. Кана никон не помешает тукэ.

Адай же пасия про вавир боко, и екхатыр же засопела. Тишина. Только пхурдыня традэн мимо.

Ах, сыр душно кхэрэ. Цело дэвэс кхам жаринэлас. Клавдия осторожнэс выгэя дро дворо. Г’эра приятно окутало шылыпнаса. Чяр сыр проджянгадяпэ. Ковлы, учи.

Ничи на дыкхно адацир. Только ягакири точка. А паш латэ колебались смутна тени. Адай сыс нашундло гиля, нэ ёй явно плыла тэлэ романы яг.

Проезжа пхурдыня освещали фарэнца дворо, и гадякири стано. Нэ Клавдия не замечала лэн, и на сгэя штэтостыр. Только ангил посыкадыяпэ, со чяр прохладно. Рат сыс хачкирды. Клавдия подгэя ко г’анынг, вытырдыя вэдра паны. Пия прямо пирдал краё. Кэдэ выпия, опять г’аздыя шэро. Адая ягакири точка посыкадыяпэ лакэ сыр зарево.

Нат, нашты ни прэ екх минута тэ ачавэс лэн кхэтанэ дрэ фэлда. Одой латэ бут другэн: и барэ чергэня, и романы гилы, и ягори. Лэскиро свэто джял прямо дро ило. А если ещё лэла тэ кхэлэл романэс, увиваться ангил лэстэ, то ёв уже сарэса ничи не сможет тэ кэрэл пэса. Нанэ просто ёй улыджия лэс пэса одорик. Ёй куч джинэл, палсо ада лакэ чейно. Нанэ просто адая ромны, хоть и тэрны. Ёй пэскирэса тэрныпнаса лэла лэс. Мурша дасавэ слаба. Конечно, ёв на дасаво, сыр сарэ, нэ ёй же ромны, а ёв ром. И сарэ сыр зракирдэпэс помогать лакэ: и   адалэ   чергэня, и кузнечикэнгирэ звоно, и дурмано чярьятыр, савэндыр   крэнцинэлпэ шэро и томится ило. А адай екджины, сарэса екджины, и никон на поможинэла.

А палсо адай тэрдо припхандло грай? Джёвори исы, эна и тэрдёл ёв сарэса смирнэс, дужакирэл лэс. Только иногда переступит г’эрэнца. Лэскиро грай. Кана только ёв и можинэл лакэ помочь. А одолакэ помогают сарэ: и адая романы гилы, и хачкирды яг. Ёй лэскэ посыкадёлапэ пэскрэ тэрныпнаса ещё гожэдыр. Времё ещё набут отлыя латыр.  Нанэ  екхджинэ   рома  традэн прэ грэндэ, нэ и казаки. И нанэ только  мурша, нэ и   джювля. Ёй на рипирэл, кэдэ последнё моло традэлас прэ грэстэ, нэ приджяласпэ. Сыс рэндо, купала дро Доно. А дасаво грай тэрдо, даже исы стремена. Чейно бы тэ заджял дро кхэр, тэ урьел индарака, нэ вдруг нечаяно тэ росджянгавэса хуланя. Потом ёй на отпхандэлапэ тутыр. А яг хачёл, и ёй одой уже, наверное, ангил лэстэ кхэлэл. И ёв прэ латэ дыкхэл. А барэ чергэня сыр виноградо тэл лэндэ. Сарэ зрикирдэпэс помогать лакэ. Сари надежда прэ дасавэстэ грэстэ. Нэ тэ заджял кэ ёв чейно тихэс. А то взовьётся про дыбы, сыр тэл лэстэ одой, прэ площадь.

– Тпружень-тпруженьки, ту прэ мандэ дякэ на косинэпэ. Мэ тырэскэ хуласкэ нанэ сарэса чужо. Мэ же лэскиро роднонэскэ чавэскэ дай. Нэ эна и годьвари. Лыджя ман кэ ёв. Только сыгэс! Дякэ, сыр на прасталас ещё никэдэ. Если мэ опоздаю, то сарэса явэла концо. Нанэ бутыр ни сави вавир надёжа, только прэ тутэ. Чюпны нанэ, собы тэ традэл, нэ ту банго саро тэ полэс. Эна только на джинав, сыр тут кхарэл тыро хулай.

Стук пэталэнца вырискирдяпэ посёлкостыр дрэ фэлда. Нэ никон на просутяпэ, никон на здивиндяпэ лэскэ. Адай, дрэ табунна фэлда, саро джиибэ джял дрэ зен. Может, конэскэ срочно чейно карик. А, может, просто озорничает, эна, сыр традэл грэс. Думинэлас ли ёй, со дякэ лэла скакать пал лэстэ прэ лэскирэ грэстэ? Значит, ангил чёрдя чавэс, потом грэс. Прэ лэскиро же грэстэ кэ ёв спешинэ.

«Ты лети, лети, мой конь…» камэлас тэ багал лакиро дад. «Урня, миро тпруженька. Тыро хулай кана на дужакирэл амэн туса. Думинэл, со никон лэс на родэл, никонэскэ на чейно, кроме Насти». А фэлда адай ровно, саро дыкхно дрэ сарэ строны. А кана – только екх чергэнори. Могла ли трин дэвэс палэ тэ думинэл, со лэла адякэ пашнанги ратяса скакать прэ чужо фэлда? Если бы кон – нибудь лакэ пхэндя, то засандяпэ лэскэ дро муй. И со прэ лэскирэ грэстэ лэла скакать кэ ёв. Ваня и Нюра, подыкхэнти прэ пэскирьятэ датэ. Гадоро смардяпэ учедыр чянгатыр. Наис, рат прикэрдя дасаво срамо. Бала растрёпана. И саро ада ваш чергэнори дрэ фэлда. «Ту урня, миро тпруженька». Нэ ёв и кокоро хай джинэл, и кокоро полэл кэ кон ла традэл. Лэс на чейнэ понукать. Урнян палэ кашта, столбы, стога. Уже нанэ душно. Сари рат прокхандыя тэрнэ кхасэса. Кай – то адай, дрэ фэлда, и ёв чяравэл пэскиро табуно прэ адалэстэ грэстэ. «Ты лети, лети…». Лачес грэс пэскэ лыя табуностыр. Годьваро, сыгно. Грай донско, а хулай лэскиро ром. И ничи лэскэ на чейно тэ припханэс. Кокоро джинэл, со пора тэ зрикирэс дрэ строна. Одорик, кай яг. Джинэл, кай тэ родэл хулас. Дрэ глушь ёй лэс затрадыя. Думинэл, адай никон лэс на лэла тэ родэл.

– Кана скачи, пожалуйста, тихэс, тпруженька. Дякэ и на джинав, сыр тут кхарэн. А то пэталы тырэ сыр веснакиро гром. Адай саро ровно, ни саво холмико. Нат, одой, правее костростыр, набаро курганчико исы. Авэн, тпруженька, одорик джя, кай ковлы чяр. Годьвари! Тэрдёв смирно! На мар пэталэнца, и на думинэ тэ хримитынэс! Чяр исы, уче, щипли. А мэ джява подыкхава.

– Ту шунэс, Будулаё, хай грай кай – то пропрастандыя.

– Наверно, кон – то табунщикэндыр традэл посёлкостыр. Мало ли, кон традэл.

– Кана уже на шундло.

– Может, саво грай отмардяпэ табуностыр. Шляется пирэ фэлда, пока лэс на латхэна.

Упратынэстыр курганостыр саро дыкхно. Яг, полутени вашэ ягори. А Настя ангил лэстэ дро саро росто вихляет телом, сыр ягитка чиба. Посверкивает настякиро саструно грай, прэ савэстэ притрадынэ Будулаёса.

– А одоя гилы, сави багалас Галя, рипирэс? Хотя мэ и сыс тыкненько, а ёй нанэ палором, мэ куч рипирав. Дякэ же хачёлас яг пашэ тумари шатра. Ту дыкхэс прэ латэ, саспэ. А то вытырдэла бабакиро бубно. Нэ, бубно мандэ нанэ, отдыём дро драмкружко. Приджялапэ би лэскиро.

Ёй вдруг забагандя. Глос грубо, гортанно, ни сыр на подджял кэ ёй. Ёй багалас прэ пэскири чиб. на кхэлэлас, только прихлопывала пэскэ дрэ ладоши. Будулаё понуро бэшэлас пашэ ягори. Зрадя псикэ. Ёй чаще захлопала ангил лэстэ дро ладоши.

Ковлы чяр мразякирэл лакэ колын. Крэнциндяпэ шэро запахостыр. А, может, ещё и одолэстыр, со ёв одой, пашэ яг ласа. А адай лэскиро грай хрустинэ чярьяса.

Внезапно ёй тэрдыяпэ. Разочарованно пхэндя пэскири глосяса:

– Ту сарэса на дыкхэс прэ мандэ. Ту саро времё дыкхэс прэ яг. Ман на шунэс.

– Не обязательно, Насте, тэ дыкхэс, собы тэ шунэс. Мэ дриван рипирав адая гилы.

Конечно же, ёв рипирэл, сыр рипирэл и саро пэскиро прогэно романо джиибэ. Нанэ зор, соб саро тэ парувэл. И ёв адай, ласа.

– А ту рипирэс, саво обычаё исы ромэндэ?

– На джинав, Насте, пал саво обычаё ракирэс.

– Если ромэстэ мэя ромны, то младшо пхэнори джял пал лэстэ палором.

– Кэ ромэндэ, Насте, сыс бут дика обычаи.

– Конечно, Будулаё.

– И сарэ против джювлэн. На гинэнпэ джювленца. Пал конэстэ припхэнэна, пал лэстэ и джял. Даже если ёв сарэса пхуро, нэ, сыр мэ, а ёй тэрны сыр ту, сарэса тыкненько.

– Мэ уже нанэ тыкны.

– Ада мэ, Настя, ваш примеро пхэндём.

– И ту нанэ пхуро, мэ тукэ ракирдём. Конечно, бут дика обычаи, нэ и лаче исы, Будулаё.

Пхув прилэл илытка удары, собы тэ рисёл палэ. И на джинэс, кай ёнэ бияндлэпэс. «Эна, савэ обычаи кэ ёнэ исы! И палсо спучья лэс, если джинэл, со ёв саро рипирэл? Сыр и гилы, со багалас лэскэ Галя. И са екх, со ёв лакэ пхэндя?».

И адай захримитындя о грай. Учуиндя пэскирэс хулас, ушундя лэскири глос. Дыя тэ джинэл пал пэстэ. И хулай ушундя, забеспокоился. Уштыя, и подыкхтя дрэ лэскири строна.

– ЧуднО.

– Ничи чуднОго нанэ. Со дасаво мандыр ушундян?

– Да нат. Ту со – нибудь ушундян?

– Со ушундян?

– Мэ куч рипирав, со зоралэс припхандём Громос, а кана, хай, лэскири глос ушундём.

«Если бы ангил не щарахалась лэстыр, ничи бы на авэлас. Ни Насти, ни костра. А кана покхарэла пэскрэ грэс, ёв срискирдяпэ ко хулай, и ачавапэ адай дро гад машкир чужо фэлда».

– Ада тукэ посыкадыяпэ, Будулаё. Успокойся. Тыро Громо кана припхандло дро дворо. Даже если срискирдяпэ, то са екх одой. Мэ кокори почюдём прэ калитка обручо. Бэш.

Будулаё камэлас сыс тэ кхарэл грэс, нэ передуминдя. Бэштя. Яг хачёл ярко.

– Камэс, скхэлава ваш тукэ? – спучья Настя, и адай же отпхэндяпэ:

– Нат, на лава мэ тэ кхэлав. Ту прэ мандэ и на дыкхэс сарэса, лишь качинэс шэрэса. Дыкхэс только прэ яг. Мэ, сыр дылыны, выламываюсь ангил тутэ. Конэс ту камэс одой тэ удыкхэс?

– Просто дыкхав.

– Мэ джинав. Опять адая гади. Ваш лакэ ту чюрдыян пэскирэс роднонэс чавэс. Кана и тут рикирэл пало ило. Кай ада дыкхно, собы ром отпхэндяпэ тэ прилэл роднонэс чавэс?

– Настя!

…….– Кэдэ затрадава прэ галякири могилка саро лакэ кокори роспхэнава.

– Ту дякэ на скэрэса, Насте!

– Состыр? Кон можинэл мангэ тэ запхэнэл тэ традав прэ могилка кэ пхэнякэ?

– Ту же джинэс, со ада нанэ чячипэ. Ту нанэ дасави.

– Эна, сыр ла жалинэс, со даже ман пошардян. Наис, со на забистырдян.

Ёй ещё со – то тихэс пхэндя романэс. Ёв испуганно-негодующе перемардя ла:

– Настя, сыр тукэ на ладжяво! Ту же ла сарэса на джинэс!

– А ту со, камэс собы и мэ покамьём ла? Дриван бут мандыр закамьян. Мэ же са екх ромны, хоть Шелоро и ракирэл, со мэ ада забистырдём. Соб адая гади армандыны мэя!

– Настя! – строгэс и зоралэс згодлыя Будулаё.

А, может, чячё, тэ уштэс, тэ згодлэс лэнгэ, собы на ракирэнас дасавэ лава, со ёй адай, саро шунэл? Состыр? Пал одова, со подкэдыя и выбарьякирдя Ваняс? Ёй скэрдя ада Ваняскэ, нанэ соб кон – то пошардя. Собы на ракирэлас Настя, а Ваня лакэ чаво. Сыр и Нюра. Ёй камэл, собы на ракирнас дякэ пал латэ. Джидо штэто нанэ про ило. Нэ ёнэ адай ла на родэнас, на кхарэнас. Ёй кокори чюрдыяпэ пал лэндэ. Ёнэ на джинэн, со ёй адай… На камэс тэ шунэс – на шун, кон затэрдыя? На тырдэ мэн.

– Настя, уже сарэса поздно. Мангэ сыго чейно тэ традав про смена.

– Нат, нат, мэ на пхэндём само главно… А ту на спучеса со?

– Поздно, Насте.

– Со ту заладил… Мэ кокори джинав, би тыро. Нэ, если на камэс тэ спучес, мэ са екх кокори тукэ пхэнава. Ту только на дыкх прэ строна, адай никонэс нанэ. Подыкх прэ мандэ. Ада мангэ должно тэ явэл ладжяво. Камэс, лэ ман дякэ, Будулаё!

– Фэдыр амэнгэ туса тэ традас адацир, Настя.

Ёв уштыя, гэя ко мотоцикло. Ёй затходя лэскэ дром. Жаркэс и жалобно пхэндя:

– Нат, пал одова, со мэ тукэ пхэндём, ту на можинэс тэ утрадэс. Ещё ни екх ромны на ракирэлас дасавэ лава. Кана ту шундян, со мэ прэ саро согласно. На чеино ни бьяв, ничи на чейно. А одой, может, ту покамэса ман. Соскэ ту штылёс? Мэ нанэ сарэса тукэ брытко, аи? Мэ лава тэ камам тут бутыр, соса Галя. Мэ джинав, со ту думинэс. Нэ ёв уже сарэса выбария. Амэндэ туса тоже явэна чаворэ. А если на покамэса, то мэ на лава неволить, сыр ваврэ. Ту на думинэ, со ада мэ тэрныпнастыр. Мэ г’ара саро обдуминдём, и тэ жалинав на лава. Ту, пожалуйста, на дыкх дрэ строна, Будулаё, а прэ мандэ. Разве мэ сарэса никудышно? Ёй фэдыр?

Виясь ангил лэстэ, тырдыя васта, ёй  гэя кэ  ёв.  Индырака крэнциндяпэ пашо бёдры. А ёв тэрдёл и дыкхэл прэ латэ.

Нат, ада Кдавдия на лэла тэ дыкхэл. Ада нанэ ваш лакирэ якхэнгэ, сыс уже учедыр лакирьятыр зорьятыр. Ухтыла, ёй уже подыкхтя пал черта, кай сыс сарэса вавир джиибэ. Чужо и нанэ джиндло. И соскэ лакэ вторгаться одорик? Ёв – ром, ёй – ромны. Екх обычай, екх чиб. Ёнэ полэна екх екхэс. Аври! Аври дасавэстыр штэтостыр! Чяр скользинэл, и чутко грай г’аздыя морда. Аври! Ада ёй не должна тэ дыкхэл! Одоцир прэ саро джиибэ. Ёй тырдэл васта кэ ёв, а ёв дыкхэл прэ латэ… «Кана, Громушка, лыджя ман палэ. Кана джинав, сыр тут кхарэл тыро хулай. Ада уже нанэ важно. И мэк, тпруженька, ёв дякэ и на уджинэла, со амэ туса самас адай. Сарэса на чейно сыс адава тэ кэрэс». Кана на дарано, со ёнэ ушунэна цокото.

– Тэрдёв, Настя, шунэс, кон – то скачет?

– Мэк. Ада мимо. Ничи на камам бутыр тэ шунав, Будулаё.

Дурырыр и дурыдыр яг, чужо джиибэ, карик ла ни кон на мангья тэ дыкхэл. Ёй на явэла против лэнгирэ бахт. Ухтыла, со ёй дадэс и чавэс розлыджия. Нат, нанэ ёй, ада марибэ скэрдя. Кана ничи нашты тэ кэрэс. Можно сыс, кэдэ ёв ещё на угэя хуторостыр, на сыс ни яг, ни Насти, ни дасавэ скачки прэ ратитко фэлда. Если на сыс тогда, то уже никэдэ на явэла. «Миро Ваня! Миро!». Ёй на лэла бутыр тэ розлыджял. И адая ромнори Настя нанэ банги ангил латэ. «Ту урняв, миро Громо…». Саро сыр – то мешается, плэнтынэлпэ дро шэро. Хай ёв нанэ Клавдя лыджял, а вавря джювля, а Клавдия дыкхэл стронатыр. Нат, ёй на лэла тэ думинэл накуч пал Настятэ. Ёй, Клавдия, только екхэс Ваняс подкэдыя, а адая ромнори эна скицик чаворэнгэ, сыр дай. А кокори бибахталы. И со за джиибэ… Кон конэс камэл… ни сыр кхэтанэ на выгэя. Ёй дякэ лэс камэл… Эна, значит, сыр джинэн тэ камэн! Прэ саро согласно. А ёв, чячё, хай дыкхэл прэ латэ, а на дыкхэл. Нэ, кана лакэ, Клавдякэ, уже са екх. Саро ачьяпэ палал. И со одой кана пашэ ягори лакэ на чейно тэ джинэл. Ёнэ рома, екх екхэс полэна.

Потырдыя шылалэса. Роса пыя прэ псикэ, хай брышынд. «Пожалуйста, шибче, Гром, а то сыго рассвето, а прэ мандэ лишь екх гадоро. Эна Ваня и Нюра подыкхэнас бы прэ пэскирьятэ датэ. Конэскэ дро хуторо тэ роспхэнэс – на патяна. Нэ и со, со тэрны? Разве только тэрнэ камэн? Ко тэрны саро джиибэ ангил. И камлыпэ явэла, и саро. А со тэ кэрэс, если уже кана ничи на явэла? Громо, ту лыджялас ман одорик, а кана палэ. Прибавь рыси».

Грэскиро топотымо прогэяпэ градоса прэ посёлкоскирэ фэнштры. Обрисияпэ паш крайнё кхэр…

– Тпруженька, наис тукэ. Нанэ ту банго, со дякэ выгэя. А кана тэрдёв, отдыхай, эна саво хачкирдо, даже взмылено. Только паны мэ тукэ пока на дава, нашты. Потом хулай дэла паны. Дыкх, ракх лэс.

Ёй дуй молы почямудя грэс. Прэ ушта лакирэ ачьяпэ лонкирдо – кирко привкусо.

Кана чейно тэ на росджянгавэс хуланя. Тихэс тэ переурьеспэ, и прэ пхурдыны, со традэна мимо. Дэвла, проскакала пашнанги ваш одова, собы тэ удыкхэл то, со на чейно сыс тэ дыкхэл. Нашты сыс лезть дро чужо джиибэ.

Мардо почюдя паш вазочка, со про скаминд. Нэ нечаянно зачиладя, ёй пыя. Ах, ту, Дэвла! Только адава на ухтылэл! Нэ хуланы заглушиндя саро пэскрэ храпоса. Дыкхно, ангил зоря лакэ дриван тэ совэлпэ, и ёй чмокала уштэнца.

Зато тихэс откэрдя порты. Мэк на холясолпэ, со на простиндяпэ.

Кана чейно ангил дром тэ пьел. Нэ ушундя джиндло стрёкото. Настякиро мотоцикло. Если не поспешит, опять может опоздать.

Только сарэ штэтытка джян. Лыджяна кукуруза. Запахо нанэ дасаво, сыр свэжо кхас. Нэ эна нужно пхурдыны. Ёй г’аздыя васт…