- -
- 100%
- +
© Сайд-Селиман Кiант Хьусайн, 2025
ISBN 978-5-0068-2502-4
Создано в интеллектуальной издательской системе Ridero
МАРХИН Г1ИЛЛАКХАШ
Альхьамду лилла́х1и роббил 1а́ламийн. Ва ссола́ту ва ссала́му 1ала росу́лилла́х1и ва 1ала а́лих1и ва асхьа́бих1и ажма1ийн вам ан таби1ах1ум биихьсанин ила́ явмиддийн. Амма ба1ду:
Лараме вежарий, йижарий! Марха кхабаран г1иллакхаш ду, Рамадан баттахь а, кхечу хенахь кхобуш далахь а. Марха кхобучо и г1иллакхаш лардарна ял хуьлу цунна Везачу Делера. Цу г1иллакхаша марха кхабар хаз до, самукъане до, ийман ч1аг1 до. Цундела, вайна довза деза и г1иллакхаш, уьш лардан а деза вай, т1аккха вай кхобучу марханах синтем хир бу вайна, самукъа дер ду марханах, ийман ч1аг1 а лур ду.
Мархин хьалхара г1иллакх, – иза 1уьйкъана х1ума йаар ду, мархана кечам беш, марха кхаба шегахь г1ора хилийтархьама. 1уьйкъан х1ума йаар суннат ду, Веза-Сийлахьчу Делера ял хуьлуш 1амал йу. Цкъа хьалха хаа деза вайна, 1уьйкъа хан д1а маца йолало. 1уьйкъа хан д1айолало буьйса йуккъе йаьлча, 1уьйра ламазан хан хилча чекх а йолу. Ткъа буьйса маца йолало? Буьйса йолало маьрк1аж хан хилча, чекх йолу 1уьйр ламазан хан хилча. Цундела, маьрк1аж ламаз т1ера 1уьйра ламаз т1екхаччалца йолчу хена йуккъерачу хенан т1ера д1айолало 1уьйкъа хан. Цу хенахь йиина х1ума 1уьйкъа хенахь йиина хуьлу, мархана кечам бан ниятца йаахь ял хуьлу цунна цунах.
1уьйкъана х1умайааран ял йевзий хьуна? Ма йоккха ял йу цунах. Аллах1ан Элчано, Аллах1ера салават а, салам а хуьлда цунна, аьлла:
«Беркат кхаанхьа ду: Джама1атехь, сарийдангахь, 1уьйкъана х1ума йаарехь».
1уьйкъана йуучу х1уманах беркат до Веза-Сийлахьчу Дала. Ткъа мел доккха х1ума ду иза, ахьа ойла йича. Мел боккха пайда бу иза марха кхобучунна. Цуьнан дег1ан, могашаллийна, динан, ийманан. Мел ч1ог1а терго йо Веза-Сийлахьчу Дала Шен лайшна. Цунна ца лаьа уьш гуттар ч1ог1а меца хуьлийла, цундела Веза-Сийлахьчу Дала 1уьйкъан х1ума йаар суннат дина вайна. Валлах1и, ма деза ду-кх Далла гергахь марха кхобучо 1уьйкъана х1ума йаар. Хьажа, Аллах1ан Элчанан, Аллах1ера салават а, салам а хуьлда цунна, хьадийсе.
Цо аьлла: «Баккъаллаъ, Аллах1а а, Цуьнан малийкаша а салаваташ дохку 1уьйкъанна х1ума йуучарна».
Дала салават дуьллу бохург, къинхетам бо бохург ду. Малийкаша салават дуьллу бохург, цара 1уьйкъана х1ума йуучунна Деле до1анаш до бохург ду. Хьажа, мел доккха х1ума ду иза! Мел йоккха ял йу иза! Мел доккха дазалла ду иза 1уьйкъан х1ума йуучунна!
1уьйкъана йуу х1ума ша кепара йаах1ума йу, х1унда аьлча марха кхобучунна г1ора хуьлу дела цунах.
Аллах1ан Элчано, Аллах1ера салават а, салам а хуьлда цунна, 1уьйкъана йуучу х1уманан хьокъехь аьлла:
«Дуьйла беркатечу кхачане».
Беркате кхача бу иза. Беркате даар а, малар а ду иза. Беркат хир ду цунах иза йиъначунна.
Оццал деза х1унда ду марха кхобучо 1уьйкъана х1ума яйаар? Дера ду цуьнга и йаийтархьама. Иза делкъхан хиллалца вуьзина хилийтархьама. Х1унд аьлча 1уьйкъана х1ума йиънарг делкъхан хиллалца мацалло хьийза ца во. Хьажа, ма боккха къинхетам бо Дала вайх. Ма атта до Веза-Сийлахьчу Дала вайна марха кхабар. Цундела вай са довла деза фарз марха а, суннат марха а кхабаран т1ехь.
1уьйкъана тамра йаар къаьсттина деза ду. Йеккъа тамра йуийла цо, йа кхечу х1уманца тамра а кхоллийла цо. Аллах1ан Элчано, Аллах1ера салават а, салам а хуьлда цунна, аьлла:
«Муъмин стагана ма дика 1уьйкъанна йуух1ума йу тамра».
Цундела, айхьа 1уьйкъанна х1ума йууш тамра а йаа хьажалахь, Аллах1ан Элчан, Аллах1ера салават а, салам а хуьлда цунна, суннат ден деш.
Лараме вежарий, йижарий! 1уьйкъана х1ума йаар деза хилар дийций вай. Цундела, 1уьйкъан х1ума ца йаар ч1ог1а дика дац, амма ца йиъча а къа дац. Цхьа къеззиг х1ума кхаьллина а цхаъ кхаллар дика ду.
Аллах1ан Элчано, Аллах1ера салават а, салам а хуьлда цунна, аьлла:
«1уьйкъанна йуу х1ума йеригге беркате йу, шу иза ца йууш ма 1ойла, аш цхьана хих къурд бай а, баккъаллаъ Веза-Сийлахьчу Аллах1а а, Цуьнан малийкаша а салаваташ дохкуш ду 1уьйкъана х1ума йуучарна».
Цундела, 1уьйкъана х1уъу а кхаллий а, йа хих къурд бай а х1ума де, баккъаллаъ Далла гергахь ч1о1га деза ду хьуна иза. Хьуна хьайна а гуш ду-кх иза мел деза ду Веза-Сийлахьчу Далла гергахь.
Конец ознакомительного фрагмента.
Текст предоставлен ООО «Литрес».
Прочитайте эту книгу целиком, купив полную легальную версию на Литрес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.