- -
- 100%
- +
© Сайд-Селиман Кiант Хьусайн, 2025
ISBN 978-5-0068-3557-3
Создано в интеллектуальной издательской системе Ridero
ЗУЛЬ-ХЬИДЖА ИТТ ДИЙНАН ДАЗАЛЛА
Ассаламу 1алайкум, лараме бусалба нах!
Альхьамду лилла́х1и роббил 1а́ламийн. Ва ссола́ту ва ссала́му 1ала росу́лилла́х1и ва 1ала а́лих1и ва асхьа́бих1и ажма1ийн вам ан таби1ах1ум биихьсанин ила́ явмиддийн. Амма ба1ду:
Лараме бусалба нах! Веза-Сийлахьчу Аллах1а вайна даийтина деза итт де. Зуль-хьиджа беттан итт де ду уьш. Уьш шеран уггаре деза денош ду. Царна чохь йина 1амал Далла уггаре дукха йезаш 1амал йу. Ма доккха беркат ду цаьрца, ма ч1ог1а деза ду уьш, ма сийлахь ду уьш Веза-Сийлахьчу Далла гергахь. Церан дазалийна тоьар дар-кх Дала цу итт де-буьйсанашца дуй биина хилар къуръан чохь, цу итт дийнан дазалла билгалдеш.
Дала боху къуръан чохь: «Итт буьйсанех а дуй буу Ас».
Дала дуй бууш йолу итт буьйса зуль-хиджа беттан хьалхара итт де-буьйса йу. И итт де деза хиларан буу Дала цаьрца дуй.
Г1урба зуль-хьиджа беттан иттолг1ачу дийнахь деш ду. Ткъа зуль-хьиджа болабелча г1урбанан де т1екхачале исс дийнахь 1амал йар ч1ог1а деза ду. И исс де а, иттолг1а г1урбанан де а чулоцуш, царех массарех зуль-хьиджан итт де олу. Ткъа цу деношкахь хьадж а до бусалба наха.
Цу итт дийнахь йина 1амал ч1ог1а йеза йу. Цуьнан дазалла билгал доккхуш Аллах1ан Элчано, Аллах1ера салават а, салам а хуьлда цунна, аьлла: «Дика 1амал йан Аллах1ана царал дукха дезаш денош дац». Элира (наха): «Х1ай Аллах1ан Элча, Аллах1ан некъа т1ехь деш долу джих1ад а дац (царел деза)?». Цо элира: «Аллах1ан некъа т1ехь деш долу джих1ад а дац, шен са а, даьхний а ца кхоош, Аллах1ан новкъахь араваьлла, т1аккха цигара йуха ца вирзина стаг воцург».
Субхьаналлах1! Лараме бусалба нах, хьовсиийша, оццул деза джих1ад ца кхочу цу итт дийнахь йинчу 1амаллийн дазалле. Оццул къахьега деза джих1адал йеза хилча цу итт дийнахь йина 1амал, ойла йехьа, ма йоккха ял хир йу цунна. Амма шен дег1аца а, бахамца а джих1аде вахна, цигахь д1акхелхинарг, – иза кхочу зуль-хьиджа итт дийнахь йиначу 1амалан дазалле. Т1аккха ойла йе, т1амехь воцуш, парг1ата шен йовха чохь 1амал йан йиш хилча цу итт дийнахь, иза йеш хила дезий вай? Сутара хила дезий вай цу т1ехь? Дера деза.
Лараме бусалба ваша, йиша! Ойла йе ахьа цу белхан. Ма йоккха ял йакхха йиш йу хьан. Ма йеза 1амалш йан аьтто бу хьан! Цу деношкахь ахьа йина 1амал Аллах1ана уггаре дукха йезаш хилча, ма дукха 1амалш ян аьтто бу хьан.
Имам Ибн Хьажара, Аллах1а къинхетам бойла цунах, аьлла: «Билггала долуш дерг зуль-хьиджа итт де схьакъастийна хиларан бахьанах, цу итт дийнахь уггаре коьрта 1амалш гулъйаларна ду, уьш: ламаз дар, марха кхабар, саг1а далар, хьадж дар, ткъа иза деригге кхечу хенахь гул ца ло».
Еригг коьрта 1амал гулйелла цу деношкахь. Мел доккха х1ума ду иза. Ткъа цу т1е, и денош чекх девлича, г1урба а до. Ткъа иза мел йеза 1амал йу. Мел хаза ду вайн бусалба дин! Мел беркате ду иза. Хастам бу Аллах1ана, вайна иза делла волчу.
Лараме бусалба нах. Шарчохь дукха денош ду, ткъа царех уггаре тоьлла долу денош зул-хьиджа беттан хьалхара итт де ду. Цундела, цу деношкахь йина 1амал а уггаре тоьлла йу, Веза-Сийлахьчу Аллах1ана гергахь кхечу деношкахь йинчул а.
Конец ознакомительного фрагмента.
Текст предоставлен ООО «Литрес».
Прочитайте эту книгу целиком, купив полную легальную версию на Литрес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.