Mmino Wa Ngwedi (Kgokagano Ya Madi)

“Mmino wa Ngwedi”

Puku ya Mathomo ya Tlhatlamano ya Kgokagano ka Madi

Amy Blankenship, RK Melton

Translator: Matlakala Kganyago

Tokelo ya Ngwalollo © 2012 Amy Blankenship

Phetolo ya Bobedi e Phatlaladitšwe ke TekTime

Ditokelo ka moka di beetšwe thoko.

Lešoka la Bosetšhaba la Angels ke legae la dikatse tša naga tša kotsi le mangau a go tšwa ntle ao a ebelago lešokeng le legolo. Ka dinako tše dingwe, mašegong a go bonagala, dipalopalo tša tšona di gola lebakanyana bjalo ka ge mo LA diphoofolo, goba bafetogi ka mo batho ba kgale ba di tsebago ka gona, di ebela nageng ya lešoka magareng ga batswala ba tšona ba kgole. Mo mašegong ao ke mo diphoofolo tša nnete di khutago ka digotlong tša tšona mola dibata tša metsesetoropong di hlasela lefelo la tšona go di tsoma lebaka le letelele, goba ka ditiragalo tše sa tlwaelegago, di elwa dintwa tšeo di ka se lwego lefelong la batho.

Ga go selo sa go tšhoša go swana le ntwa ya bafetogi, ge o mongwe wa tšona a ka gobala, di ba kotsi kudu go batho go no swana le diphoofolo tša bo tšona. Go šireletša batho bao di dulago magareng a bona, dikgakgano tša bafetogi, ge go kgonega, di dirwa ka mehla kgole le batho bao gomme lefelo le lekaonekaone ke kua garegare ga lefelo la go tsoma la setlogo la tšona.

Bošegong bjo lešoka le be le homotše kudu ge beng ba babedi ba tlelapo ye kgolokgolo ka mo motseseropong ba tsena nageng yeo e sa kgwathwago, ba tšola diaparo mekokotlong ya bona gore sebata sa ka gare se sepele ka tokologo.

Bošegong bjo ba be ba tsoma lebitla la vamphaya yeo e ka ba bolayago bobedi.

Ka mo garegare ga lešoka mo batho ba ka se ba kwego, Malachi, moetapele wa sehlopha se sennyane sa mangau, a fofela leswiswing go ya lenabeng la gagwe… monna yo a bego a sa swanela go mo tshepa le gatee go feta mogwera wa gagwe. Tebanya ya gagwe e be e le mofetogi wo mongwe, yena yo madi a katse ya nageng a sepelago le megalatšhika ya gagwe, Nathaniel Wilder… modirišanimmogo wa gagwe mo mengwageng ye 30 ya go feta.

Malachi o ile a tšwelela lebaleng gomme a hwetša Nathaniel a eme fao a mo letile ka sebopego sa motho. Ge a tšea dikgato tše mmalwa go ya pele, go be go swana le go sepela go tloga go sebopego se sengwe go ya go se sengwe ge Malachi a boela morago go sebopego sa gagwe sa motho. Bobedi bja bona ba be ba le bogale go sena taba gore ba boetše go sebopego sefe. Bjalo ka batho e be e le boramabelo ka mešifa ya go tia ka tlase ga letlalo le boreledi. Bafetogi ba tšofala ka go nanya gomme banna bao ka bobedi ba bonala ba na le mengwaga ye 30 le ge e le gore ba šetše ba fihla go mengwaga ye 50.

Nkabe se e be e le mobi wa Hollywood, go be go tla tšea metsotso ye mmalwa gore ba fetoge kudu, efela seo e be e le nnete gomme go be go se dintatauwane tša go kgahliša lefelong le. Lepono ga se selo go mofetogi gomme ngwedi o be o kganya bjalo ka lebone la bogale ka gare ga maru a ledimo ka godimo ga bona.

Ga se go swanele go fihla fa,” Nathaniel a realo, ge a tsepeletše fase a leka go bolela le mogwera wa gagwe ka seo. “Ntheeletše! E be e le mengwaga ye masometharo ya go feta gomme dilo di fetogile… ke fetogile.”

“Mengwaga ye masometharo ya go tlala ka maaka!” Malachi a rora, lentšu la gagwe le kwagala mo lefelong leo. Tebelelo ya gagwe e lotola lefelo leo a bolokile Kane gomme a kwa go hlabahlaba ga mušimeetse go tlala ka mahlong a gagwe. “Ka lebaka la gago, Ke kgokagantše Kane le ditšhila… ka lebaka la gago ke mo tlogetše mengwaga ye masometharo!”

“Nka se go dumelele go mo epolla, Malachi! O tseba seo se tla go hlagelago ge o ka dira bjalo,” Nathaniel a bogela ka letšhogonyana ge Malachi a lebelela lebitla la monna yo e bego ele mogwera wa gagwe wa potego. O be a sa kwešiše seo le gatee. Kane ke vamphaya gape ya kotsi.

Kane gape e be e le o mongwe wa dilo tše pedi tšeo di emego tseleng ya bodirišanimmogo bjo hlamegago magareng ga dikatse tša naga… Kane le mosadi wa Malachi yo mobotse, wa go se tshepagale, gape wa go se botege Carlotta. Nathaniel o mo ratile pele. O be a sa nyake gore go felele ka tsela ye. Mafelelong, Nathaniel o ile a rarolla bothata ka lebaka la mona… a bolaya nonyana tše pedi ka leswika le tee.

“E be e le mogwera wa ka gomme ga senke a ntahletše! O kare ke wena yo a nkekilego!” Malachi o ile a bušetša morago dikeledi tša pefelo, ge a fihlelela lengina leo a leaperego; lengina la Kane. O dirile eng? Ge a hwetša Kane a khunametše mosadi wa gagwe wa go hlokofala, o ile a emanyana ka go hlakahlakana, go fihlela ge Nathaniel a kgonthiša gore Kane ke mmolai.

O hlokofaletše gona fa tšhemong ye, ka fao a nagana gore go maleba go kgokaganya Kane le naga ye… mabung ona ao. O ile a utswa gape puku ya maleatlana ya Kane gomme a e diriša kgahlanong le yena go itefeletša.

Ee, Nathaniel o bolela nnete ka selo se tee. Bontši bja divamphaya ke ba babe, efela gona le maarogi a mmalwa gomme Kane ke o mongwe wa bona. Ga go se sebe sa go feta seo a se dirilego. Maleatlana ao a ka bušetšwa morago ke molekani wa semoya wa Kane fela.

Malachi o ile a nagana gore ke tshegišo ka nako yeo ka gobane Kane ke kgale a phela gomme ga senke a kopana le molekani wa gagwe wa semoya. Kgale, yena le Kane ba be ba hlwela ba dira metlae ya gore basadi bao ba ka se tsoge ba belegwe. Monagano wa gagwe wa gopola tša morago ka myemyelo ya Kane ge a re, ‘modimo o swanetše go ba le tshegišo ka go bopa mosadi yo a tla swanelago ke go emela mathaithai a gagwe.’

“Ke kgale a le fao lebaka le letelele.” Nathaniel a mo lemoša. “Ka mohuta wa kganyogo ya madi le bogaswi tšeo di mo kitimišago… ge o ka lokolla Kane gabjale, o ile go re bolaya.”

Hlogo ya Malachi e ile ya retologa ka pefelo gomme a lebelela Nathaniel. “O tla swanelwa ke go bolaya nna fela ka gobane wena o tla be o šetše o hwile.”

Ka matšhošetši a filwego, banna ba babedi ba boela gape go dibopego tša diphoofolo tša bona.

*****

Mo mollwaneng wa lefelo la kampa la kgauswi le lešoka la diphoofolo tša naga Tabatha King, goba Tabby bjalo ka ge bohle ba mmitša bjalo, o dutše ditepising mo setulong se segolo sa go kampa sa batswadi ba gagwe a lebeletše dinaledi tšeo di tšwelelago ka gare ga maru a makoto. O ile a pikitla mahlo a gagwe le go thabišwa ke gore mafelelong pula e khutše.

Ke lekga la mathomo a eba kampeng gomme sa mafelelo seo a nyakago go se dira ke go kotopana ka gare ga RV. O be a thabetše leeto leo kudu gomme a thaba le go feta ge ba mo dumelela go tla le mpšanyana ya lapa Srappy. O ile a ba kgopela lebaka le letelele, efela ka morago ga go tshepiša gore o tla hlokomela mogwera o monnyane wa gagwe wa potego, mpšanyana ya seYorkie, batswadi ba gagwe ba ile ba mo dumelela.

Scrappy gabjale e be e goba leswiswing, e dikologa thapo ye ba e kgokeletšego go yona, e nyaka go kitimiša meriti yeo e gogilego šedi ya yona. Mosetsana yo monnyane o ile a tšhoga ge ka bjako Scrappy e kgaola thapo gomme ya tšhaba. O ile a emelela ditepising tša tšhipi ge mpšanyana e kitimela lešobeng le lennyane la legora leo le aroganyago lefelo la kampa le lešoka la diphoofolo.

“Scrappy aowa!” Tabby a goeletša gomme a kitima ka morago ga mpša. Batswadi ba gagwe ba be ba mo tshepile gore a ka se e timetše. A ema legoreng, a gogela moya teng mola a lebeletše ka leswiswing la dihlare. “Ga se nna lefšega.” A loma pounama ya ka tlase ka phegelelo pele a kwatama ka dikhuru go lekola lešoba.

Ka morago ga go gopa gannyane ga mmalwa fao, o ile a ipitlaganya lešobeng leo la legora gomme a kitima ka mehlareng a latela modumo wa go goba kua kgole. “O ile go ntsentšha mathateng,” a hebahebetša ka bogale, gomme a thoma go thwantšha leleme la gagwe ka go tseba gore mpšanyana gantši e a tla ge ekwa modumo woo.

“Tabby, o gokae?”

Ka morago ga gagwe, Tabatha a kwa mmagwe a mmitša efela o be a na le phegelelo ya go hwetša mpša ya gagwe go e bušetša morago kampeng. Scrappy ke mpša ya gagwe gomme o swanetše go e hlokomela. Ka fao go ena le gore a arabe mmagwe goba go bitša mpša, a homola le go latela modumo wa go gobela godimo wa Scrabby.

E se kgale Tabatha a swanelwa ke go ema motsotwana le go goga moya. O ile a ithekga ka mohlare gomme a bea diatla tša gagwe dikhurung tša ditšhila, a hema le go theeletša medumo ya lešoka. Ke kgale a nyaka go ema ka gare ga mehlare le go no theeletša go swana le ka fao maIndia a dirago mo go dimobi tša TV.

Maru a pula ao a bego a phatlaletše lebakanyana la go feta a ile a boa gomme lesedi la ngwedi wa go kganya la timelela ka bjako. Mahlo a gagwe a tomoga ge a lemoga gore ga a kgone go bona mabone a lefelong la kampa le gatee.

A tšea kgato ka tlhokomelo ya go ya pele, a lebelela gohle ka makalo efela seo a se bonego ka moka ke leswiswi, le dikutu tša mehlare tša go se bonale gabotse, le meriti ye meso gape. A tsitsila ge se sengwe se rora kua kgole ka morago ga gagwe. A akanya gore ga a rate lehlakore leo, a kitima ntle le go lebelela morago

Ka morago ga nako ye telele, a kwa Scrabby e goba gape gomme a kitimela lehlakoreng leo ka tshepo ya gore seo se bego se rora ka nako ye se be se sa mo kitimiše. A kwa go rora go gongwe efela ka nako ye go be go etšwa go gongwe ka pele ga gagwe

A gatelela dikgato tša dinao mobung, o lekile go emiša go redimoga efela mabu a be a apešitšwe ke mahlare a go redimoša le maraga go tšwa puleng. Go ena le gore a eme, a redimogela pele ka lehlakoreng la gagwe pele a wela ka moeding.

O ile a felelwa ke moya gannyane ge mmele wa gagwe o thula mohlare wa go wa gomme wa emiša go redimoga ga gagwe. Sa mathomo seo a se lemogilego ka morago ga go goga moya ke gore Scrabby ga e sa goba le gatee. A kwa go rora gape gomme a thoma go namelela mmotong ge a ekwa go bobola ka boleta. A abulela godimo ka dikhuru tša gagwe, a hlodimela ka kutu ya mohlare gomme a bona lefelo la go se be le selo mo lesedi la ngwedi le kganyetšago thwii mo tlase.

Gona fao mo gare go dutše Scrappy, e tswinya o kare e sa tšo longwa ke mpša ye nngwe tlase kua mmileng wa kua gae. Mpšanyana e be e patlame ka mpa mo fase gomme e abula ka santhago. Mahlo a gagwe a matalalerata a tomoga ge a bona lebaka la seo. Diphoofolo tše pedi di be di batamelana ka go nanya mo lefelong leo gomme Scrabby a le garegare ga tšona.

“Dummy,” Tabby a hebahebetša ka boleta.

O ile a lemoga diphoofolo go tšwa diswantšhong tšeo tatagwe a mo laeditšego tšona pele ba tšea leeto. Ye nngwe e be e le katse ya naga gomme ye nngwe a e lemoga go tšwa telebišeneng… lengau. O be a rata go bogela dipontšho tša diphoofolo gomme o be a sa di tšhabe go swana le mmagwe ge diphoofolo mo TV di leka go hlaselana. Efela seo se fapane… ke nnete gape go tšhoša gannyane.

Ke dikatse tšeo di ka go jago, gape ke tše dikgolo. Diphoofolo tša mosepelo o mobotse di a dikologana di rora ka garegare ga megolo ya tšona gomme mahlo a tšona a kganya bjalo ka dimetale tša gauta. Modumo wa go garola letswalo o kwagala moyeng, o fokela go Tabetha ge a tšwela pele go di bogela ka makalo ya letšhogonyana.

“Etla Scrappy,” a hebahebetša, a holofela gore dikatse tše dikgolo di ka se mo kwe. “Etla mono pele ye nngwe ya tšona e go gata.” O be a nyaka go re ‘go goja’ efela o be a sa nyake go tšhoša mpšanyana go feta fa.

Ka bjalo dikatse tša goeletša le go dira gore Tabatha a thibe ditsebe tša gagwe ka magoswi a gagwe ka gobane modumo o le o mogolo le go tšhoša. Tša kitima ka lebelo go selaganya lefelo leo, le go dira gore Scrabby e hunyetše mosela wa yona magareng ga maoto a yona gomme ya tswinya ka letšhogo.

Ka go bona mpšanyana ye tšhogilego, Tabatha o ile a fologa mohlare gomme a kitimela go Scrappy ka lebelo ka mo a ka kgonago. a khupetša mmejana wa yona ka bjako ka wa gagwe ge diphoofolo di fofela godimo le go thulana moyeng ka godimo ga hlogo ya gagwe thwii.

“Hle le se gobatše mpša ya ka!” a goeletša.

A goeletša gape ge marofa a bogale a ngwapa letsogo la gagwe gomme a mangwe a ngwapa mokokotlo wa gagwe. Dikatse tša wela fase ka morago ga gagwe thwii ka modumo wa go lla ga marapo, di rora le go goeletšana. O ile a dula fao a khupeditše Scrappy, yeo e bego e thuthumela le go lla ka boleta, a sa nyake go lebelela diphoofolo tše lwago dikgato tše mmalwa ka morago ga gagwe.

Tabatha o be a tšhaba go šikinyega gomme a itshwareletša ka mpša ka go tia ka mo a ka kgonago. Mahlo a gagwe a tswaletšwe ka go tia gomme a thoma go hebahebetša go Scrappy gore e kitime go yo nyaka thušo, ge ye nngwe ya dikatse e ka mo swara. Se sengwe sa go thapa gape sa borutho sa šašetša mokokotlong wa gagwe efela a se šikinyege le gatee. Mafelelong, ntwa ya emišwa gomme a leka go lebelela ka thoko ga legetla la gagwe.

A thoma go thuthumela le go lla ge a bona banna ba babedi ba robetše ka morago ga gagwe ba thankgetše ka madi gohle. Tabatha a emelela ka dikhuru ka go nanya le Scrappy e le ka matsogong a gagwe gomme a thoma go katakata. Naa katse ya naga le lengau di ile kae? Naa di hlasetše banna bao babedi gomme tša tšhaba? Goreng banna bao ba sa apara diaparo?

Nathaniel a bula mahlo a gagwe gomme a mo ntšhetša meno a bogale kudu.

Tabatha o ile a katakatela morago gomme a nyaka go wa efela a ema gabotse gape. Scrappy ya tswinya gape ge monna yo a rora a ekišetša modumo wa katse ya naga gomme ya leka go lwa go tšwa ka matsogong a Tabby. E ile ya kitimela ka lešokeng e goba ka letšhogo.

Malachi o ile a ikgoga gannyane ge madi a etšwa kgareng ya gagwe. O ile a bula molomo wa gagwe gomme a rora ka lentšu le tee go mosetsana.

“Kitima!” lentšu la gagwe le feletše ka kgoeletšo ya go hlaba tsebe ya lengau.

Tabatha ga senke a nagane gabedi ka go obamela seo. O ile a kgopela ka dinaong gomme a kitima go tloga lefelong leo ntle le go lebelela morago. O be a sena taba gore o lebile kae; efela go tloga go monna yola wa go tšhoša wa go tlala ka madi.

*****

“Ke a leboga gomme se ke ditaba tša selegae. Bošegong bjo balapa la selegae ba na le lebaka la go keteka. Morwedi wa bona, Tabatha, o hweditšwe mafelelong a ebela ka gare ga Lešoka la Bosetšhaba la Angels ka morago ga go timela matšatši a mararo a go feta go tšwa lefelong la kampa kgauswi le Letsha la Crystal go nyaka mpša ya lapa. Gabotstbotse mpša e ile ya ikgokolla thapong ya yona gomme ya kitimela ka lešokeng. Mosetsana wa mengwaga ye šupa ka mafolofolo o ile a kitimiša mpša gomme ba se mo hwetše go fihlela mesong ye. Ka go hloka mahlatse, mpša ga se e hwetšwe le yena. Go ya ka bahlankedi o amogetšwe Bookelong bja Setšhaba go hwetša kalafo ya letšhogo, ka mo go lego o phologile go tlhaselo ya katse ya naga. Tabatha yo monnyane o tšwetše pele go botša marentšara a lešoka ka ga banna ba babedi ba go gobala ka lešokeng efela ka morago ga go ba tsoma ka go tsenelela lefelong leo la dimaele tša dikwere tše sekete, ga go seo ba se hweditšego. Re tla le botša tše dingwe ka moragonyana ga iri.”

Kgaolo ya 1

Morago ga mengwaga ye 10 …

Mmino wa lešata o lla ka morethetho ka tlelapong, leswao la yona la neon le lephepole le legolo le fetoša mebala ka go latelelana le mošito. Lesedi le laetša go kganya ga go tšhoša moagong go seleganya mmila. Tlhakeng ya moago, monna yo mokopana, wa meriri ye mesehla ya go taga o eme ka leoto le tee le ithekgile mo murumong. A khunamela pele, ka seku se le go khurung ya gagwe yeo a e kobilego, mola a fola sekerete.

Kane Tripp a sekamiša hlogo ya gagwe gannyane gomme a sepetša seatla sa gagwe ka meriring ye mekopana ya go emela godimo. O hloile go e kota, go lahlegelwa ke botelele bja yona. O sa gopola go kwagala ga yona ga silica a phophola mokokotlo wa gagwe kua tlase. A emišetša sekerete dipounameng tša gagwe, a se gogela ka teng go tsenelela a tseba gore o lahlegetšwe ke dilo tše dintši, go swana le disekerete tšeo a bego a tlwaetše go di fola pele a bolokwa a phela gomme a tlogelwa bahung.

Mengwaga ye masomenne ye metelele o ile a swarwa ke Malachi a sa itebetše, moetapele wa sehlopha se sennyane sa mangau, gomme a latofatšwa ka go bolaya molekani wa mofetogi. Pele ga bošego bjo, Kane o be a na le kwano ye botse le mangau, le moetapele wa bona e be e le yo mongwe wa bagwera ba gagwe ba potego. Dipounama tša Kane di ile tša sesefala ka kgopolo yeo. Malachi o ile a mo sekiša, ahlola, le go mo otla ka lebaka la tlhohleletšo ya pefelo.

A diriša maleatlana a go tšwa pukung yeo Kane a bego a nagana gore o e utile ka tlhokomelo, Malachi o ile a mo kgoka ka thogako, a sa kgone go šikinyega goba go bolela… a sa kgone gape le go itšhireletša. Gomme a tloša lengina le leswika la madi leo le fago tokologo ya go sepela mosegare. Leswika la madi leo pele le bego e le la vamphaya ya mathomo, Syn.

Kane o kile a botšiša gore go tla bjang gore go be le ya mathomo gomme karabo ya mo makatša.

Syn o tlile lefaseng le a nnoši, a gobetše le go swarwa ke tlala. Lesogana la mo hwetša gomme ka lebaka la tlala, Syn a tšea madi a gagwe. Vamphaya ya lemoga ka pela gore batho ba lefase le ke dibopiwa tše bokoa, gomme semoya sa bona se a ba tlogela ge ba ka abelana ka madi, ka kholofelo ya go bopa lapa la mo planeteng ye. Efela ge meoya ya bona e tlogile, ga ba sa na mohola go yena gomme ba fetoga dintatauwane.

Mo bophelong bja gagwe bja go se fele, Syn o hweditše batho ba mohuta woo ba bararo bao ba šalago le semeoya sa bona… ya ba bana ba gagwe. Phapano ye tee fela ke gore ge ba fetošitšwe, letšatši le a ba tšhuma… la ba tlogela le bana ba bobona ba dintatauwane go khuta mahlaseding a mosegare. Ga senke go be le bothata planeteng ya Syn ka lebaka la leswika la madi.

Mapanta a letsogong a makoto ao Syn a bego a apare a tšwa lefaseng la gagwe gomme a dirilwe ka Leswika la Madi, Tšhipi ya karolo ya mapanta a letsogong, o ile a akanyetša ka palamonwaneng, pheteng, le lengineng le tee. Kane gape a fihlelela le go kgoma lengina leo a le aperego.

Mo leswika la madi le bego le mo fa bophelo bja tlwaelo bja magareng… e bile puku ya Syn ya maleatlana yeo e bilego phuhlamišo ya Kane. Syn o e tlogeletše bakgethiwa ba gagwe go le diriša ka bohlale mola a robetše. Ka gare ga yona go be go le maleatlana a go tšhoša, tsela ya go kokobetša bana ba go hloka meoya ge ba eba kotsi go batho.

Ge maleatlana a go tšhoša a dirišwa go yena, Kane o be a lebeletše ka mahlo a maso, a go se ponye ge mogwera wa gagwe wa kgale a mo tšhela ka garafo ya mabu godimo ga hlogo ya gagwe. Sa mafelelo seo a se gopolago ke lefaufau la go tlala dinaledi ka godimo ga lešoka la mehlare.

Leswiswi le be le mo tlaletše gomme go homotše kudu. Maleatlana a mo kgokile efela o be a kgona go kwa dilo ka lefaseng di redimoga ka godimo ga gagwe. Dibopiwa tše dinnyanennyane, tša go phela tšeo di bego di efoga goja letlalo la gagwe la go se hwe efela ka go se tsebe di tshwenya moya wa gagwe.

Ge nako e feta, o be a nagana gore ka nnete o a gafa, gomme a thoma go kwa mantšu kgafetšakgafetša… mantšu. A be a amogelega go yena ka kgolegong ya gagwe gomme o be a duma go kwa a mantši.

Ka dinako tše dingwe o be a ekwa malapa ka botlalo, gomme ka dinako tše dingwe a ekwa ba bagolo fela. Ka dinako tše dingwe o be a leka go lwantšha maleatlana, go nyaka thušo goba go ba le ba bangwe. Maleatlana a ile a mo swarelela, a mo dira gore a hloke maatla. O be a tseba maleatlana a… o be a diriša go dintatauwane. E be e le maleatlana a marangrang kudu ao a nyakago madi a yo o mo ratago go mo lokolla. Maleatlana a lerato a maatla ao molekani wa semoya wa motšwasehlabelo a ka robago.

Gantši a be a šoma go divamphaya tša go hloka semoya ka gobane o swanelwa ke go ba le semoya go bitša molekani wa semoya. O ile a diriša maleatlana go feta gatee go thuša lefase go fediša polao ye ya setemone ya bana ba motho bao ba sa tsebego selo efela tumo ya madi.

Kane o ile a sega ka kgegeo ka kgopolo yeo e mo šetšego morago ya go tseba gore go fedile ka yena… ka gobane ga a na molekani wa semoya. Efela, ga senke a kopana le motho wa mohuta wo. Gomme ge eba o na le yena, gona ga go kgonagalo ya gore a ka no tšwelela lebitleng la gagwe mola a etšwa madi. Malachi o be a kwele bohloko kudu… o be a rata mosadi wa gagwe kudu ka fao a nyaka Kane a tseba botebo bja lerato la mohuta woo le go le duma.

O be a tloga a le duma. Makga a mantši o be a rothiša meokgo, a kgopela sengwe le sengwe seo modimo a ka mo theeletšago, go mo tlišetša molekani wa gagwe wa semoya gore a lokologe. Ge eba o bolaile mosadi wa mogwera wa gagwe ka nnete, gona e be e tla ba kotlo ya toka. Efela o be a se na molato go bosenyi bjo.

Bošego bjo bongwe, ka morago ga lebaka le letelele a lahlegetšwe ke tshepo … a kwa seo. Modumo wa moswananoši wa go rora ga Malachi wa tšwelela go polelonoši ya ka gare ga gagwe, wa latelwa ke go goa ga sephoofolo go gongwe ka pefelo. Gomme ka makalo, a kwa lentšu la mosetsana yo monnyane ka godimo ga gagwe thwii a ba kgalema gore ba se bolaye mpšanyana ya gagwe.

Modumo wa lentšu la gagwe le lennyane, la go tšhoga la roba se sengwe ka gare ga gagwe, gwa mo dira gore a dume go lokologa, gore a kgone go mo šireletša go sebata bošegong.

‘Malachi a ka se gobatše mpšanyana ya gago ngwana o monnyane,’ Kane a hebahebetša ka monaganong.

E be e le nnete. Malachi a ka se gobatše motho ge feela ba ka mo senyetša kudu ka tsela ye nngwe… kudukudu ge e le ngwana. Ka go tseba gore mogwera wa gagwe o go gongwe ka godimo ga gagwe, Kane a kwa lehlasetšana la bophelo le boa go yena. O ile a befelwa kudu ge mosetsana a goeletša gape gomme a kwa se sengwe se wela mo fase ka maatla. Madi… a nkgelela madi a maswa a tšhologilego a nwelela ka gare ga mobu wo boleta a etla go yena.

E be ele sa go amogelega seo a ilego a kopana naso. Monkgo wa tsena monaganong wa gagwe gomme wa nyaka go mo romela go bogodimo bjo bogolo bja go gafa, a tseba gore a ka se fihlelele seo. O be a le bokoa kudu ka go fetša nako ye ntši a senke a nwe le lerothodi la meetse… a kgalega go hwa efela a se hwe. Ke mo a kwelego wo mongwe wa menwana ya gagwe o šikinyega.

Kane a lebiša šedi ye kgolo go seo gomme a beakanya seo se bego se šetše monaganong wa gagwe go leka go šikinyega. A kwa matšatši a feta, a bala ka phišo yeo a e kwago ka mabung ka godimo ga gagwe. Monkgo wa madi o mo dikologile bjale, o mo iša pele. Mafelelong, a kgona go diriša matsogo a gagwe ka go nanya gomme a thoma tshepedišo ya go nanya ya go ikepolla ka lebitleng la gagwe.

Matšatši a mantši a fetile gomme ge seatla sa gagwe se tšwelela ka bogodimong, o ile a lla ka meokgo ya lethabo ka nnete. A ikgogela ka ntle ga ditšhila, Kane a bula mahlo a gagwe gomme a lebelela godimo, a sega bjalo ka segaswi ge a bona lefaufau la go fifala le dinaledi ka godimo ga hlogo ya gagwe. Ge a lebelela fase mabung, a lemoga lerathana la lešela leo le nago le marothodi a madi a go oma godimo ga lona. A le topa, a le iša nkong ya gagwe a gogela monkgo wa madi ka teng ao a mo lokolotšego.

A swara segopotšo sa mophološi wa gagwe a se kgwahlišitše ka letsweleng la gagwe, o ile a gogela mmele wa gagwe ka moka ka ntle ga mabu. Malachi le mofetogi yo a bolailego mosadi wa lengau ka nnete o bolokilwe dikgatong tše mmalwa go tloga lebitleng la gagwe.

Ge a lebelela go ba feta go ya lešokeng, o be a tseba gore mosetsana ke kgale a sepetše efela Kane o ile a ba le bonnete bja gore ngwana yo ke molekani wa gagwe wa semoya. Ke mang yo a ka kgonago go roba maleatlana ao Malachi a beilego go yena?

Ka ge a be a sa fokola go ka tsoma mosetsana, Kane a abulela go Malachi, a nyaka go kgoma lerama la monna. Ge a retollela sefahlego sa gagwe go yena, mohemo wa Kane wa mo tlogela a gakanegile. Malachi o be a apere lengina la leswika la madi. Lengina la gagwe!

Ka pejana gape ka pefelo le ka mosepelo wa lebelo wa go se lemogege, Kane a emelela a swere lengina ka letsweleng la gagwe. A lebelela Nathaniel, monna yo a mo tsentšego kotsing. Kane a kgoboketša leswiswi go mo dikologa bjalo ka klouku gomme a timelela leswiswing.

Kane a ntšhetša moya ntle le go bogela mmuši o nyamelela moyeng, o dira manyokenyoke ka pele ga gagwe pele o timelela moyeng. O feditše mengwaga ye lesome a tloga nageng ye nngwe a eya go ye nngwe, kontinente ka kontinente, a ithuta tšohle tšeo di mo lahlegetšego ka lebaka la kotlo ya kgolego ya mengwageng ye masometharo ya gagwe.

O tla aga maatla a gagwe a go mo thuša, a thoma ka mpšanyana ye tšhweu ya seYorkie yeo a e hweditšego e thothomela ka gare ga mošoba wa mohlare ka lešokeng leo. E be e le seruiwaratwa sa motho yo mongwe gomme o be a ithogaka go dira selo se bjalo, efela nyakego ya go e fepa e be e le maatla go feta letswalo la gagwe ka nako ye.