Бөрүлер дугайында чечен чугаалар (Рассказы о волках)

Глава

Лобо

1 эге

Чаа Мексиканың соңгу талазында малчыннар чурттап чоруур улуг девискээрни Куррумпо деп адаар. Ол оранның улуг делгем одар-белчиирлеринде бажын ашкан мал оъттап чоруур, арыг-кылаң суглары Куррумпо деп хемче агып кирген, ол-ла хемниң ады-биле шупту бо черни база адаар апарган. Ол бүгү оран-девискээрниң тергиидекчизи кырган көк бөрү Лобо турган.

Кырган Лобо болза Куррумпо хеминиң шынаазын үр чылдар тургузунда хоозурадып келген өөр көк бөрүлерниң аажок улуг баштыңы. Ол черниң кадарчылары-даа, малчыннары-даа ону дыка эки билир. Лобо бодунуң шынчы өөр бөрүлери-биле каяа-даа келгенде, мал-маган кырып, коргуушкун тарып чоруп бээр. Мал ээлери идегелин ышкынып эгелээн. Кырган Лобо өске бөрүлерден күчү-күжү-биле ылгалдыг, ооң кажары-даа, угааны-даа аажок улуг мага-бодунга дөмейлешкен. Ооң дүне улууру безин өске бүгү бөрүлерден чоон, күштүг кылдыр дыңналыр, ооң улуурун тус черниң шупту чурттакчылары бо-ла дыңнаан боорлар. Бир эвес турлаг-хонаш чоогунга бөдүүн бөрү шак-шагы-биле улуур болза, кадарчылар херекке-даа албастар. А кажан кашпалга кырган баштың бөрүнүң улууру дыңналганда, кадарчылар уйгу-дүжүн чидирип, дүвүреп-ле эгелээрлер. Даң адарга-ла, кодан малы хоозураан деп медээни олар албан дыңнаар ужурга таваржырын билирлер.

Лобонуң өөрүнүң саны хөй эвес. Чүге ындыг болганын билип чадап турдум. Бир эвес кандыг-бир бөрү тергиин байдалды чедип ап, өөр бөрүлер аразынга күчү-шыдалын көргүзер болза, ол хөй санныг талалакчыларны бодунче хаара тыртар. А Лобо чүгле бодунуң күзээни дег санныг өөрлүг болуксаан-даа чадавас; ооң каржы-дошкуну өөр бөрүлериниң саны көвүдевес турган чылдагааны бооп база чадапчок. Лобонуң сөөлгү чурттаан чылдарында ооң өөрү чүгле беш бөрүден тургустунган. Оларның кайызы-даа билдингир, кайгамчык улуг бөрүлер болур. А бирээзи, Лобонуң дузалакчызы, ылап-ла кайгамчык улуг бөрү болган. Ындыг-даа болза, күш-шыдалы, аваангыр-кашпагайы-биле Лобога канчап-даа четпес.

Бо өөр бөрүлер шупту чонга база эки билдингир турганы чугаажок. Бирээзин, чараш маңган ак бөрүнү, мексиканнар Бланка деп шолалаан. Ону Лобонуң чоок эжи, кыс бөрү дижир. Өскезин, сарыг кештиг кашпагай улуг бөрүнү дүрген халыыр чээренни безин чыпшыр чедер кулугур деп, улус чугаалажыр турган.

Бо бөрүлерниң чуртталгазы оларны узуткаар күзелдиг малчыннарның чуртталгазы-биле сырый холбаалыг. Кандыг-даа малчын Лобонуң баштааны өөр бөрүлерниң кайызының-даа кежи дээш бодунуң каш-даа молдургазын харам чокка бериптеринге белен. Ындыг-даа болза, кандыг-даа арга-биле ол бөрүлерни кым-даа узуткап чадап каан. Олар шупту аңчыларны шооткан-даа дег, кандыг-даа хоран ажыглап хораннаарга-даа, черле алыспас, бети дизе сөөлгү беш чыл дургузунда олар Куррумпонуң малчыннарындан үндүт хавырарын уламчывышаан. Ындыг санаашкын езугаар алырга, «көк дээрбечилер» ийи муң баш ажыг малды кырып каапкан болган. Олар кезээде-ле, төтчеглээрде, өөр малдың аразындан эң шыыраан, семизин шилип чаңчыкканнар.

Эрги шагның бодалы-биле алырга, бөрү үргүлчү аштаңгы болгаш чүнү-даа сыырыптарынга белен дижир, а бо таварылгада ол шынынга черле дүүшпес, бо араатаннар болза кедергей семис-чаагай, чемге аажок далдаачал болганы эскертинген. Билдингени болза «көк дээрбечилер» боду өлген амытанга, аарыг азы чудаан малга черле дегбези элдеп, кадарчының боду аайлаан малынга база дегбес. Чиш кылдыр чүгле боттарының тудуп алганы аныяк малче халдаар, молдурга туткан болза, эң чаагай чымчак эъдин шилип алырлар. Кырган буга азы инек эъдинден ойталаар, ческинер болган дижир. А хой эъдин оларның шуут тоовазы база билдинген, ынчалза-даа күжүр хойларны, оюнчактап, анаа-ла кырып туруп бээри база бар. 1893 чылдың бир дүнезинде Бланка-биле ол улуг сарыг бөрү ийи чүс бежен хойну үзерлээш-чазарлааш, чаңгызының-даа эъдин амзап дегбээн болганнар.

Бо өөр «көк дээрбечилерниң» хөй-ле хоозуралдыг халдаашкыннарының дугайында чугааларны оон-даа көвей кылдыр киирип болур. Барык чылдың-на бо бөрүлерни узуткаар сорулга-биле янзы-бүрү аргаларны чогаадып, шенеп турганы шын, ынчалза-даа хей чүве, оларның дайзыннары болган малчыннар чеже-даа кызарга, чеже-даа кажарлаарга, бөрүлер менди-чаагай чурттаарын уламчылавышааннар.

Лобонуң бажы дээш канчаар-даа аажок улуг шаңнал чарлаан. Ону хораннап шенээн дижир, ынчалза-даа ол хоранны даап билгеш, оюп кааптар болган. Ооң чаңгыс коргар чүвези – октуг боо. Бо черниң чурттакчылары шупту боолуг деп билгеш, Лобо кижиже черле халдавас, харын-даа аңаа таварышпазын кызыдар. Өөр бөрүлер бир кайгамчык дүрүмнүг дижир – кижини кайы ырактан хайгыылчы бөрү эскерип каар болза, олар шупту ол черден дезиптер. Өөр бөрүлерин Лобо чүгле боттарының аайлап алган дириг амытаннарының эъдин чиирин чөпшээрээр турган, ол өөредиг оларга езулуг-ла камгалал болган. Лобонуң чытчызы кайгамчык, кижиниң хол дегзипкенин, хоранның чыдын безин дораан билип кааптар. Ынчангаш өөр бөрүлер айыылга алыспайн, мынчага дээр бүдүн-бүрүн чоруурлар.

Бир хүн бир малчын кырган Лобонуң аажок таныыры улуушкун-кыйгызын дыңнап каан, ол малчын эр дуюкаа чоокшулап келгеш, көөрге, өөр бөрүлер хөй эвес санныг инектерни бүзээлээн турганнар.

А Лобо ырак эвес дөң кырында оларны хайгаарап чыткан, Бланка өске бөрүлер-биле инектер аразында казыраны бүзээлеп, сегирип аар дээш чадажып турганнар. Ынчалза-даа мыйыстыг мал база дүжүп бээр эвес, олар дөгере төгериктей чышпыр турупкаш, мыйыстарын дайзынга удур арнып келгеннер.

Адак сөөлүнде Лобо көрүп ора, шыдашпайн барган хире, дөңден куду баткаш, өөр малдың кырынче дыңзыг ырланган соонда, халый-ла берген.

Хөлчок корткан инек мал кайда боор, араатанга оруун чайлап бериптерге, Лобо доп-дораан инек малдың ортузунда барган. Күжүр инектер тос башка тоо быдарадыр халчып-ла кааннар. Демдеглеп алган чижи база бар шаа-биле ыңай болган, ынчалза-даа чээрби базым хире маңнап чыдырда, Лобо ону чыпшыр четкен. Казыраның мойнундан ызырган соонда, бөрү оозун дүжүр каккаш, чыттыр базып алган. Бөрүнүң дүжүр каккан күжүнге казыраның буттары дедир баштанып, дукпуртуланы берген.

Лобо база кээп дүшкен, ынчалза-даа дораан тура халаан. Арткан бөрүлер күжүр казыраже улаштыр халый бергеш, күжүр малды бичии када-ла аайлап каапканнар. Лобо ол чазарлаашкынга бичии-даа киришпээн. Чижин черже октапкан соонда, өске бөрүлерге ол чугаалаксаан-даа ышкаш болган: «Чүге чаңгызыңар-даа мээңии дег арга кылбадыңар? Хей черге үе чидирдиңер?»

Бо бүгүнү эгезинден көрүп турган малчын дыңзыг алгырып, бөрүлерже углай халдып чоруптарга, черле ындыызы дег, олар тос башка тарай халчы бергеннер. Малчын бир шил стрихнин деп хоран уштуп алган. Бөрүлер бодунуң аңнап алган малын чиир дээш, албан эглип келир ужурлуг деп, малчын даап бодааш, хоранны өлүг казыраның үш кезээнге тарай чашкаш, чорупкан. А кажан эртенинде хоран салып каан черге, бөрүлер дилегзинип келгеш, көөрге, «көк дээрбечилер» казыраның эъдин чиирин чиггеш, артында-ла хоранныг кезектеринге дегбейн, хынамчалыг аңгылааш, ырадып октапканнар болган.

Ынчалдыр-ла ол аажок улуг бөрүнуң мурнунга коргуушкун малчыннар аразынга улам-на өөскүп, тарай берген, чыл санында Лобонуң бажы дээш шаңнал база-ла өзүп турган, адак сөөлүнде муң долларга – узуткаттырган бөрү дээш черле туруп көрбээн өртек-үнеге четкен.

Бир катап Куррумпо кашпалынга улуг шаңналга көгүттүрген Техас чурттуг Теннерей деп аңчы халдып келген. Ол аңчы аңнаарынга өөренгени илдең, тергиин эки дериг-херекселдиг, эң эки бооларлыг болгаш шилиттинген аъттарлыг база аажок улуг бөрү тудар ѳѳр аңчы ыттарлыг келген. Бодунуң чурттунга ол аңчы ыттары-биле эвээш эвес бөрүлерни узуткап каан болгаш, каш-ла хонгаш, кырган Лобонуң бажының кежи ооң эзериниң соңгу бажынга халайтыр астына берген чоруур кылдыр бодап алган келген. Ындыг болурунга Теннерей аңчы чайгылыш чок бүзүрелдиг.

Бир чайгы эртен, чер кыры чаа-ла чырып орда, Теннерей эрес-дидими-биле аңнаашкынче аъттаныпкан. Удатпаанда олчаның изин тыпканын улуг ыттар хөглүг ээрги-биле ээзинге дыңнаткан.

Бөрүлерни олар ийи миля1[1] хире хемчээлдиг ыракта маңнап бар чыдарын эскерип каан, сүрүүшкүн ам оон-даа килеңниг, оон-даа калчаа апарган. Бөрү тудар ыттар чүү боор, өөредип кааны-биле, бөрүлерни чүгле доктаадып, бүзээлээр, ол үеде аңчы чедип келгеш, оларны боолаар ужурлуг турган. Техастың ажык оргулааш черлеринге бо арга-биле бөрүлерни узуткаары белен, а мында байдал көңгүс өске. Кырган Лобо бодунга таарымчалыг девискээрни шилип алырын билир. Куррумпо хемниң болгаш ооң адырларының хаяларлыг кашпалдары оргулааш черлерни бүгү талаларындан кежилдир таварып эрткен. Кырган бөрү бо таварылгада эң чоок турар кашпалдарның бирээзинче углапкаш, ону кеже халааш, аңчыдан ырап шыдаан. Ооң өөр бөрүлери тарай маңнажы бээрге, оларны сүрген ыттар ызыртыр чедер дээш, база-ла тарай маңнажы берген болган. Аңчы ыттар катап катчып кээрге, оларның саны эвээжей берген болганын ээзи эскерген. Теннерей аңчы кежээ ыттарын кыйгырарга, чүгле алдызы эглип келген, оларның ийизи кедергей балыгланган болган. Ындыг-даа болза, аңчы бодунуң күштүг күзелинден ойталаваан. Ооң соонда безин ийи катап Куррумпонуң хааны болган бөрүнүң бажының кежин союп алыр деп оралдашкан-даа болза, түңнел чок болган. Сөөлгү бир оралдажыышкыны чидиригге чедирип, Теннерейниң эң эки аъдынга халаптыг болган, оозу илдиккеш, өлүр ушкан. Чүгле ынчан, аъдын чидиргеш, Теннерей идегелин ышкынып, аңнаашкындан ам-на ойталаан. Лобога Куррумпо оранын хүлээдип, биеэги хевээр кара туразында чагырарын чөшпээрээн дег, Техас чуртунче дедир-ле чана берген дижир.

Бир чыл эрткен бе, эртпээн бе, ол-ла алыксанчыг шаңналга көгүттүрген база ийи аңчы чедип кээп-тир. Кайызы-даа алдарлыг Лобону чүгле мен-не ылап шыдаар мен деп бүзүреп, бодап турганнар.

Аңчыларның бирээзи чаа чогааткан, тускай арга-биле ажыглаар хоранның дузазы-биле ону чедип аарынга идегеп турган. Өскези, Канададан француз, база-ла хоран ажыглаар деп, харын-даа ол хоранга шишпилгелиг сөстер немээрин бодап турган, чүге дизе ол Лобо дээрге анаа бѳрү эвес, а хуулгаазын кижи-бөрү деп бүрүнү-биле бүзүреп, ону бөдүүн арга-биле узуткаары болдунмас деп санаан.

Ынчалза-даа кандыг-даа онза-тускай хораннар, кандыг-даа шишпилгелиг сөстер болгаш хамнаашкыннар Лобога бичии-даа хора чедирбес болган. Ол биеэги-ле хевээр хүн бүрүде кылыр эргиишкинин кылып, хүннүң-не дойлап турган. Ай четкен, четпээнде бе, ол келген аңчылар база-ла идегелин ышкынып, оон ыңай оралдажырындан ойталааш, өске черлерже аңнап чорупкан дижир.

Джо Калоннуң аалы Куррумпо хемниң бир бичии адырыының чанында, кайгамчык чараш кашпалда, хаялар аразында туруп турар.

Ол аалдан муң хире-ле ярд2[2] хемчээлдиг черге Лобо биле кыс бөрү Бланка ижээн кылып, аңаа оолдарын өстүрүп турган.

Джонуң бөрүлерге удур кылып турган шупту-ла оптуг аргаларын, хораннаарын болгаш какпалаарын кочулаан-даа ышкаш, Лобо-биле Бланка ол чайын Джога хамаарышкан мал-маганны: инектерни, хойларны, ыттарны кырып чайлааннар. Ол ийи демниг бөрү куйлар болгаш чалым хаялар аразынга шуут айыыл чок чурттап турганнар, күжүр Джо оларны оон тура канчап үндүрүптер чаа арга тыварын азы шуут-ла динамит дузазы-биле узуткаарын бодап, бажы ыжып туруп берген. Ынчалза-даа ол ийи бөрү Джонуң аспаандан көңгүс бүдүн-бүрүн ушта чылбырап, дээрбечи халдаашкыннарын биеэги хевээр уламчылаар болган.

– Маңаа Лобо бо чайын чайлаан кулугур чүве – деп, Джо, чалымныг туругже айтып алгаш, меңээ чугаалады. – Мен ооң-биле чүнү-даа канчап чадаштым. Анаа-ла мелегейзип артып калдым.

2 эге

Ооң мурнунда бо малчыннарның бөрү дугайында солун чугааларынче улуг-ла сагыш салбайн, оларга чигзинип-даа турганым шын, ынчалза-даа 1893 чылдың күзүнүнде ол кажар дээрбечиге бодум таваржып, ону өскелерден артык билип алганым хөөредиг эвес.

Бо болуушкуннар болурунга чедир каш чыл бурунгаар, Бинго деп ыдым дириг турда, бодум база бөрүлерни-даа аңнап чордум. Ынчалза-даа ол үеден бээр, ажыл-агыйым аян-шинчизи өскерлип, колдуунда-ла бижиттинер стол болгаш сандайдан турбастап калган мен. Шак ынчан Куррумпода чурттап чоруур бир өңнүүмнүң аалынче, Чаа Мексикаже мени чалаан чүве. Амыдыралымның аян-шинчизин өскертиксээн күзелим дирлип, өңнүүмнүң мени «көк дээрбечилерни» узуткаарын шенезин деп турарын билгеш, чалаанын ол дораан хүлээп алдым.

Четтикпестеп, Куррумпо талазынче далажып үнүптүм. Эге хүннерде ол оран-девискээр-биле таныжар дээш, чоок-кавы черлерни аъттыг эргидим. Мээң орук баштакчым өйлеп-өйлеп кандыг-бир инектиң сөөктеринче айтып, чугааланып-ла чор: «Ооң ажылы-дыр!»

Ындыг черлик, кедергей сай-даштыг черге Лобону ыттарлыг болгаш аъттарлыг сүрерин бодаан-даа ажыы чок деп билип кагдым. Кара чаңгыс шын аргалар чүгле какпалаары болгаш хораннаары деп меңээ тодаргайы-биле көстүп келген.

Ол илби-шидилиг «кижи-бөрүнү» тудуп алыр дээш, чүнү кылбадым дээр. Янзы-бүрү, болгу дег-ле кажар аргаларны ажыглаарымга, түңнел чок. Ол дугайында бирден бирээ чокка чугаалавас-даа мен. Стрихнин, мышьяк болгаш синилдиг кислотаның кандыг-даа холуксаазын Лобога удур хоран кылдыр ажыгладым. Какпага чемиш кылдыр кандыг-даа малдың эъдин салып турдум. Ынчалза-даа хүннүң-не дүүнгү ажылым түңнели кандыг ирги дээш, какпаларымга чеде бээримге, куруг боор, шупту күжениишкиннерим үре-түңнел чогунга шынзыгып турдум. Бөрүлерниң кырган хааны эмин эрттир кажар болган, мен ону ажып кажарлап шыдавадым.

Лобонуң кайгамчык чытчызын чаңгыс чижек көргүзүп болур.

Бир аңчы ирейниң сүмелээни-биле, хөй эвес быштакты чаа соккан инектиң бүүрээниң чаа-биле катай эргизиптим; демир чыды чытталбазын дээш, ол быштакты сөөктен кылган бижек-биле доорадым. Холуксаа соой бээрге, ону кезектерге чаргаш, ол кезек бүрүзүн үттээш, ооң иштинче чыт билдиртпес карттарже суккан элээн хөй хемчээлдиг стрихнин болгаш цианистиг калийни суп кааш, үттерни кырындан быштак-биле дугладым. Бо ажылды кылып тургаш, инектиң чылыг ханынга булгаан хол-хаптарын холумдан ужулбайн, кылганым чемишче тынмазын кызып турдум. Ажыл төнерге, чемишти база-ла инектиң ханы-биле борап каан, үс-биле чаап эттээн шоодайже суккаш, аъттаныптым. Ол-ла инектиң бүүректерин база баарын хендирге кедиргеш, соомдан шөйүлдүр сөөртүп алдым. Он хире миляны долгандыр чоруп, орук дургаар миляның дөрттүң бири хире болгаш-ла, кылып алган чемижимниң кескиндилерин, холум-биле дегбезин шыңгыы сагып, октагылап келдим.

Бо девискээрге Лобо чеди хонуктуң эгезинде көстүр чүве, а өске үени ол Сьерра Гранде дагның эдээниң чоогунга-ла эрттирип турган боор.

Чеди хонуктуң бирги хүнүнде, кежээликтей чоруур деп турган кежээвисте, бөрү улааны дыңналган. Бир малчын эскергенин чугаалады:

–

Ол-дур ол! Ам чүү болур эвес, көрээлиңер!

Эртенинде, аъттаныпкаш, кажар аргамның түңнелин көрүп көөр дээш, какпа салган черимге дораан четтим. Лобо баштаан араатаннарның истерин дораан эскердим, а ооң истери бо-дур деп, кандыг-даа бөрүнүң изинден улуг болганындан, кижи билип кааптар.

Удатпаанда бөрүлер хендирге сөөртүп чораан эъдимниң чыдын чыттап каан хире. Лобо бирги чемишке чоокшулап келгеш, ону чыттааш, адак соонда ызырып алган деп бүзүредим.

Борта кээп, амырааным чажырып шыдавааным шын.

–

Ам-на туттурду бо кулугур! – деп хөлзеп алгырдым. – Удавас ооң өлгенин көөрүм ол-дур!

Бөрүнүң довуракта арттырып каан улуг истеринден карак салбайн, аъдымны бурунгаар маңнадыптым. Ол истер келзе-келзе, орук кыдыында мээң октап кааным ийи дугаар чемижимге чедирген, ол чемиш база читкенин эскердим.

Өөрүп-байырлап турганым-даа кедергей!

Ол ам меңээ туттурган! Өөр бөрүлерниң чамдыызы база туттурган!

Ынчалза-даа бөрүнүң баскан калбак истери оруктан читпээн, эзеңгиге туруп алгаштың, оргулааш черни харап, топтап көргеш, бөрүнүӊ мөчү-сѳѳгүн дилегзингеш, черле эскербедим.

Улаштыр ооң изи-биле чоруткаш, үш дугаар чемижим база читкенин эскердим, а бөрүнүң истери оон-даа уламчылааш, дөрт дугаар чемишче углаан болду. Оон бодап турарымга, Лобо ол чемиштиң чаңгызын-даа чивээн болган, аксынга сөөртүп алгаш, оларны оваалай чыып, мээң кылган кажар аргамны шуут херекке албаанын көргүзер дээш, ол оваа-чемишти хир-чуду-биле бужартадып каан болду. Кылган чүвезин кылгаш, ол «көк дээрбечи» серемчилелдиг камнап чоруур өөр бөрүлери-биле оруктуң көңгүс өске талазынче, бодунуң херектерин кылып, арлы берген деп ам билдим...

Хоран-биле бо дайзынга күш чедери болдунмазын шынзыткан ындыг янзылыг таварылгаларның аразындан чүгле чаңгыс чижекти көргүстүм. Ооң соонда какпалар база чагыттым, оларның келирин манап тура, ховунуң бөдүүн бөрүлерин болгаш өске-даа араатаннарны хыдыыр ажылга киржип эгеледим.

Бир хүн Лобонуң кайгамчык кажарын шынзыткан база бир таварылганы эскерип көрген мен. Лобога чагырткан бөрүлер чүгле чалгаа чазар дээш, хойларны бо-ла туткулаан, коргуткан болурлар, ындыг-даа болза, хой эъдин ында-хаая чиирлер. Кодан хойлар анаада муң-муңу-биле малчыннарның хайгааралында оъттап чоруур. Дүне када оларны ырак эвесте камгалалдыг черлерже киир сүрер, коданның ийи талазынга малчыннар хонар. Хойлар аажок ээдергейи-биле, хензиг-ле чүүлден уш-баш чок тарай маңнажыр деп баар, ындыг-даа болза, олар боттарының баштакчызын кезээде эдереринге быжыг чаңчыккан. Кадарчылар хойларның ындыг чаңын билир болгаш, кодан хой аразынче алды хире хуна киириптерлер. Күжүр хойлар «сегел салдыгларга» чүгле чүдүвес, оларның угаан талазы-биле ажып турарын чүүлдүгзүнген-даа ышкаш, дүне дүвүрээзин болурга-ла, хуналарны дескиндир туруп алырлар.

Бир-ле дүне, он бир айның төнчүзүнде, ийи малчын бөрүлер халдаанындан оттуп кээп-тирлер. Кодан хойлар хуналарны долгандыр мөөңнежип алган турганнар. Ол хуналар чогум угаанныг-даа эвес, кортук-даа эвес болгаш, ойтур шавыышкынга белеткенип, боттарының туружун салбайн, дидим турганнар. Ынчалза-даа – халак! – ол халдаашкынны анаа эвес бөрү удуртуп турган! Кырган Лобо! Ол «илбилиг кижи-бөрү» кодан хойнуң сорук киирикчи күжү өшкү-хунада деп малчыннардан дора эвес билир болгаш, чыпшынчыр туруп алган хойларның ооргаларының кыры-биле маңнааш, баштыңнары болган хуналарже халый бергеш, оларны ол-ла дораан узуткап каапкан. Хайлыг хойлар ол-ла дораан тос башка тарай маңнажы берген.

Ол болуушкуннуң түңнелинде ай хире чыгыы кандыг-бир дүвүрээн кадарчыга хүннүң таваржып, мындыг уткалыг айтырыг-ла дыңнаар турдум:

– Кайы-бир черге «Ото» деп таңмалыг аскан-читкен хойну көрбедиңер бе?

– Иет, Кылаң-даш деп кара сугнуң чанынга беш-алды хире хойнуң мѳчү-сѳѳгүн көрдүм – деп харыылаар ужурга таваржыр турдум.

Азы:

–Чок, көрбедим, ынчалза-даа Хуан-Мейр дээрзи ийи хүн бурунгаар Пөштүг тей баарында бөрүлер херип каапкан чээрби хире хойну көрген-дир.

Ынчап турумда ам-на бөрү какпаларын эккелген, оларны салыр дээш, ийи дузалакчым-биле бүдүн чеди хүн ишти ажылдап келдивис. Кара күжүвүс харамнанмайн, кандыг-даа кажар аргаларны чедиишкинниг ажыглаарын бодап турдум. Эртенинде какпалар салдынган соонда, оларны хайгаарап, хынап бар чыткаш, бир какпадан өске какпаже углаан Лобонуң изин эскердим. Ол истерни өөренип көрүп, бөрүнүң шупту дүнеки ужуралдарын шинчилеп номчудум.

Ол караңгыда чимзенип чорааш, какпалар чеже-даа хынамчалыг чажыртынган болза, бир дугаар какпаны тып алган бооп-тур. Өөр бөрүлерни доктааткаш, Лобо черни карак кызыл казып тургаш, какпаны, а ол ышкаш илчирбе-биле доорбашты тып алган. Ол какпаны көзүлдүр арттыргаш, «көк дээрбечи» улаштыр өске какпаларны тыпкаш, база ушта казып каапкан. Удаваанда билгеним болза Лобо оруунда бир сезинчиг чүве эскерип каапканда, чаңгыс черге тура дүшкеш, өске кыдыынче базыптар болган.

Ол үеде мээң бажымче чырык бодал кире дүшкен: какпаларны “Н” деп үжүк хевирлиг салыр деп, өскээр чугаалаарга, кокпага какпаларны ийи талазындан дургаар салгаш, ол үжүкке оорга болур кылдыр ортузунга база бир какпаны салыр-дыр. Ынчалза-даа мээң оом чогумча чогунга шынзыгарым ындыг-ла үр болбады.

Лобо ол кокпалап кел чорааш, ийи талада чергелештир салдынган какпалар аразынче кире бергеш, кара чаңгыс доора салдынган какпаны эскерип каан. Ол өйүнде доктааган болду.

Шак ол черде какпа салдынган деп чүүлдү Лобонуң та канчап эскерип, билип кааны мээң бажымче черле кирбес, харыы тывылбас-дыр. Кандыг-чүү-даа болза, Лобо оң-даа, солагай-даа талазынче эгбейн, оожум болгаш оваарымчалыг, базым бүрүзүн биеэги изинче базарын кызып, айыылдыг черни дедирленип эрте берген болган. Оон какпаларны өске талазындан оюп эрткеш, ол артыкы буттары-биле даштарны болгаш чер бузундуларын хоора соп тургаш, какпаларны дөгерезин чазылдырыпкан.

Оон-даа өске дыка хөй таварылгаларда Лобо база ынчаар кылып турган, ынчангаш янзы-бүрү аргалар ажыглаарымга-даа, ол кезээде кадык-чаагай дезе бээр болду. Чааскаан чорааш, боду черле часпас турган боор. Хандыкканы ооң эжи-ле бак салымныг бооп, кырган бөрүнү өлүмге чедирген. Ол эвес болза, хоозурадыышкыннар ам-даа уламчылавышаан боор. Чааскаан черле тиилеттирбес боду бүзүрээри эжиниң кичээнгей чок болганындан калган маадырларның узун даңзызынче Лобонуң ады ынчалдыр киргени ол.

3 эге

Өөр бөрүлерде эп-найырал кошкааган деп бир кезек демдектерден эскердим. Чижеглээрге, өйлеп-өйлеп кырган баштыңның мурнунда маңнаан улуг эвес бөрүнүң истериниң тода көзүлгени. Меңээ ол чүүл билдинмес болган. А бир катап ол дугайында бир малчын меңээ мынча дээн:

– Бөгүн оларны көрдүм. Өөр бөрүлерден адырлып, оларның мурнунда маңнап чоруур амытан болза Бланка деп бөрү болду.

Бүгү чүве ам-на меңээ билдингир апарган соонда, улаштырдым:

– Бланка – кыс бөрү деп билдим, чүге дээрге эр бөрү ынчаар чаңнаан болза, Лобо ол-ла дораан ону чок кылыр турган.

Шак ол чугаа меңээ чаа бодалды киирген. Инекти соккаш, ооң чанынга ийи көстүп чыдар какпа тургустум. Оон инектиң бажын кескеш, ону кедээр салдым, долгандыр алды күчүлүг демир какпаларны таарыштыр черге салып, хынамчалыг чажырдым, ол какпаларның чыт-бузун база кызып чидирген мен. Инек бажын бөрүлер тоовас боор чүве, олче кичээнгей салбас. Ол ажылды кылып турумда, мээң холдарым, идиктерим болгаш чепсек-хереглелим инек ханынга былчашкан. Долгандыр черни база инек ханы-биле чаштырдым, ылап-ла инек бажындан хан төгүлген кылдыр көргүзерим ол. Какпаларны черге хөмгеш, оларның кырында элезинге шөө-бөрүнүң кежин дээстим, ооң аспаа-биле долгандыр көвей истер арттырдым. Инек бажы-биле чокпак үнүштерниң аразынга кызаа эртер чер артар кылдыр башты салып кагдым. Ол эртер черге эң-не шынарлыг какпаларымны, баштың бодунга быжыглааш, салдым.

Бөрүлер кандыг-даа өлген секти ырактан чыттап каапкаш, ону чиир бодалы чок-даа болза, чоокшулап кээр чаңчылдыг. Ынчангаш Куррумпо оранның өөр бөрүлери ол чаңчылынга шынчы болуп арткан болза, какпа-дузаамга ам-на туттуна бээр ирги бе деп бүзүрелим ышкынмадым. Лобо бөрү инек эъди-биле кылган үүлгедиим эскерип кааш, бөрүлерни какпага чагдатпас деп бичии-даа чигзинмедим. Ынчалза-даа шуут-ла херээ чогу-биле ырадыр октаттынган ышкаш чыдар инек бажынга бүзүрээним шын.

Эртенинде даш бажы сарыг шокар турда, хамыктың мурнунда какпаларны хынап чоруптувус.

Ой, эжен! Бөрүлерниң истери тода ында көстүп турлар, а какпалар быжыглаан инек бажы турган чер куруг болду! Далаш-биле истерни топтап көрдүвүс, Лобо шынап-ла өөр бөрүлерни эътке чоокшулатпаан хире, ынчалза-даа бир бичежек бөрү, орук ындынче отктаттынган инек бажын чыттап чыткаш, какпага туттунган болду.