Трибунал обывателям Великого княжества Литовского

Шкрутыния и назначнъе дне до справъ крывавыхъ суду нашему Господарскому належачмхъ

Шкрутынiя, а по нашему выведанье, маеть быти чынено, гдѢбы которой сторона потребовала того, только в сихъ речахъ: коли кому идеть о почстивость або о горло, а то въ тотъ часъ кгды сторона жалобная сторону противную въ такихъ речахъ до кгроду позоветъ а были бы доводы албо отъводы вонтъпливые. А то для того, кгдыся таковые справы о почтивость за отосланьемъ врядовымъ на съймъ, а о горло за опеляцiею до суду головного приточать; тогды абы обе двѢ стороны зъ справами своими готовы были. А ижбы ся таковые справы о почстивость па сеймъ припалые завджы судити и отправовани па сойме могли; тогды отъ початку сойму, который па день назначоный за листами нашими пропозыцiею завжды зачинатися маеть, а пропозыцыи отправованью при послѢхъ земскихъ в томъ пановъ радъ цалый тыж день подле дня до судовъ таковыхъ речей маемъ мети такъ Польскихъ яко и Литовскихъ. А потомъ, покуль одно соймъ будеть, маемъ отъправовати таковы справы па кождую середу пятницу и суботу.

О апеляцыяхъ въ речахъ крывавыхъ до суду головнаго

Хто бы оселый у Великомъ Князстве Литовскомъ в справе такой, которая идетъ о горло, по сказанью суду къгродского и будучы па горло сказанымъ, хотелъ апелевати до суду головного, таковому кождому апеляцыя маеть быть допущена; ведже под тымь обычаемъ ижъ тот, кого бы врядъ на горло сказалъ, маеть по собе певное рукоемъство дати людми оселыми шляхтою трема або двема особами, же ся ку росправе передъ судомъ головнымъ становить будетъ, а сторона жалобливая до скоченя права абы была от стороны противное здоровья своего безпечна. A гдѢ бы таковый поручниковъ выдавши передъ судомъ головнымъ не сталъ, тогды судъ головный такового сказавши на горло маеть черезъ листъ свой его до насъ Господара па выволанье отослати; а мы Господарь будешь повиньни заразъ его казати выволати вечнымъ выволаньемъ, ижъ вжо таковому окглейть нашъ на поднесенье выволанья даванъ быти не маеть. Которого такового выволаньца кождый врядъ кгродскй гдѢ колвекъ пристигнувши за жалобою и помоцью стороны укрывъжоное поймати и горломъ его карати разсказати, а головщыну и иншiе шкоды и презыски судъ головный на самыхъ поручникахъ сказавши ку отправе того на ихъ именьяхъ до того вряду кгродского, подъ которымъ они оселости свои мети будуть, отослати маеть што врядъ тотъ поступкомъ вышей описаннымъ выконати будеть повиненъ. А поручники з тыхъ всихъ своихъ шкодъ на имѢнью и маетности того, по комъ поручили, поискивати мають. А пакли тотъ истый па горло сказанный за порукою будучiй сторону свою поводовою о смерть приправилъ; тогды поручники будучи о то отъ повинныхъ забитого припозваны передъ судъ головный за доводомъ правнымъ сами горломъ мають быти караны, а естли бы ранилъ, ино раны и шкоды всякiе, штобы ся при забитью або ранахъ стало, совито навязывати и нагорожати будуть повинни. А того всего поручники и ихъ потомки смотрети собе будуть па ономъ местьцу, по комъ ручыли, и на маетности его лежачей и рухомой. А гдѢ бы таковый кому идетъ о горло, рукоемства не далъ, тогды черезъ врядъ маетъ быти у везенью задержанъ до чотырохъ недѢль, а въ томъ часе о рукоемство старатися маеть, а если бы в тыхъ чотырохъ недѢлъ рукоемства по собе не далъ, тогда предся обвиненый у везенью зоставаетъ, а судъ головный по оказанью от стороны поводовое декрету суду кгродскаго, будетъ ли тотъ декретъ водлугъ права учыненъ, вжо на выконанье тое справы до коньца до того жъ суду кгродского отослати ее маеть. А пакъ ли бы правомъ поконаный не даючысе вряду загамовать прочь упорнѢ съ замку альбо съ двора нашего зышолъ, тогды такового врядъ на выволанье до насъ Гопосдара черезъ листъ свой отвороный отослати, а за презыски за разомъ жалобнику отправу па маетности его, якую мети будеть, учинити будеть повиненъ. По тому жъ и стороне поводовой, естли бы ся декретъ суду кгродского не водлугъ права виделъ до головъного жъ суду апелевати вольно, а позванный вжо безъ рукоемства яко вышей описано передъ судомъ головънымъ ку pocпpaвѢ становитися маеть.

Местца судомъ головнымъ у Великомъ Князстве Литовскомъ назначоные

Место Вилъна

Воеводство Виленьское, поветъ Ошменьскiй, Лидьскiй, Вилькомирскiй, Браславскiй, а к тому воеводство Полоцкое.

Место Троки

Воеводство Троцкой, поветъ Городненскiй, Ковенскiй, Упитьскiй, а в Жомойти у месте Росеняхъ суды головные отправованы быти мають, альбо тамъ, где ся зезволятъ.

A въ Новгородку

Воеводство Новгородское, поветъ Слонимскiй, Волковыскiй, воеводство Берестейское и поветъ Пиньскiй.

А въ Меньску

Воеводство Витебьское, поветь Оршаньскiй, воеводство Мстиславские, воеводство Менское, поветь Мозырскiй и Речыцкiй.

А въ тыхъ всихъ местехь каждый врядъ кгродскiй, кгды судьи головные приедуть, повиненъ будеть для судовъ в замку або у дворе нашомъ Господарскомъ домъ якiй поступити, такъ же и господы в месте пристойные тымъ судьямъ маеть казати дати и записати.

Способ беспечности соймиковъ, на обиранье тыхъ судей, и порядковъ прихоженья передъ тотъ судъ головный

Передъ который тотъ судъ особа жадная якогожъ кольвекъ стану достоенства и годности, который бы справы своее не мелъ, приходити не маетъ, аж кого з рейстру закличуть до справы, не зь жадною зъ кграею приступити и до кгмаху въходити маеть, толко на болей самъ четвертъ, то есть самъ с прокураторомъ а зъ двема приятели увоити маеть, нижли естли бы колько участниковъ водлѢ позву до одное речы и справы тоежъ належало и тые увойти мають, а тые вчастники вси только одного прокуратора а двухъ прiятелей мети мають. А естли бы который упорный не маючи справы вшолъ, а будучи напомненъ выйти не хотелъ, альбо въ дому судовомъ воланье чинилъ; таковый кождый маеть быти виною дванадцатьма копами грошей Литовскихъ каранъ, которую за разъ под тоюжъ другою виною не сходечы с права судови положити и заплатити повиненъ будеть, а заплативъшы предся вонъ выйти. А хто бы тому былъ противенъ: на таковомъ заразомъ отъправа вделана быти маеть. А при вотованью абы нихто незоставалъ опрочъ самыхъ судей головныхъ присяглыхъ. Къ тому жаденъ яко па сойму обиранья тыхъ судей у воеводстве и повете, такъ и на местьцо тое гдѢ суды тые головные ку отправе судовъ заседали будуть, абы несмелъ приеждчати и приходити збройне з жадными бронями и з никоторою стрельбою окромъ меча корда шабли и шпады, и для того кождый приѢждчаючы до места того судомъ пазначоного виненъ будетъ ручницы передъ местомъ томъ выстрелили и скоро приѢхавши такъ ручницы гаркабузы яко и луки въ господе поховати, и з ними нетолько до суду але и по месте такъ въ день яко в ночи ходили и стрельбы жадное чинити не маеть. А гдѢ бы хто кого якою стрельбою ранилъ; тогды за то горломъ каранъ быти маеть, а естли бы забилъ ино почстивость и горло тратитъ. А хто бы смелъ иначей учинити и стрельбою по месту альбо на местце судовое ходити, абы виною дванадтцатма копами грошей былъ каранъ заразомъ не сходечы отъ суду альбо отъ соймику. А естли бы хто будучи о заплату тыхъ винъ упомненъ упорно прочъ отъ суду отшолъ альбо отъѢхалъ, не заплативши тыхъ винъ всихъ, вколько бы упалъ альбо одное которое з нихъ; тогды таковый маеть быти отосланъ черезъ листъ судей головныхъ на екъзекуцыю до воеводы або старосты оного повету, гдѢ оселость маеть, а въ небытности ихъ самыхъ до наместъниковъ ихъ. А гдѢ бы хто на соймику въ которую с тыхъ вину одну альбо вколько ихъ впалъ; тогды тотъ врадъ къгродскiй, где ся соймикъ отправованъ будеть, маеть на таковомъ тые вины отправовати таковымъ способомъ, то есть позвавши его передъ себе въ такой речи на рокъ завитый позвомъ на двѢ недели, и заразомъ не спускаючи з местца на немъ самомъ, кгды станетъ, тую вину отправовати, а кгды не станетъ, тогды на имѢнью его кромъ вшелякое фолькги отправу въдѢлати повиненъ будеть. Которое вины вряду кгродскому половица а другая половица судьямъ головнымъ належати маеть, которыхъ винъ врядъ заразомъ скоро по отправѢ половицу судьямъ головнымъ тымъ, подъ которыхъ обираньемъ альбо владзою тотъ выступокъ станется, отсылали маеть под виною на судъ головный дванадцатма копами грошей, о которою вину судъ головный тотъ врядъ з оселости его передъ себѢ позвати будетъ мочи на рокъ завитый, будь самыхъ пановъ воеводъ старостъ альбо ихъ намѢстниковъ.

А если бы хто на именью своемъ за тые вины вряду кгродскому отправы вчынити не допустилъ; тогды таковый непослушный еще удвое въ таковые вины вѢпадываеть, а врядъ къгродскiй противъ таковаго в отъправе тыхъ всихъ винъ далъ поступовати маеть такъ, яко нижей о отправахъ речей черезъ тыхъ судей головныхъ отсужоныхъ есть описано и доложоно, чынечы врядъ тому всему досыть подъ такою жъ виною вышей описаною; а таковый тежъ порядокъ при судехъ кгродскiхъ и земскiхъ заховатися маеть и противъ выступныхъ таковымъ же способомъ поступовати врядъ будеть повинен.

Варунокь на беспечность того суду головнаго

А варуючы безпечность тыхъ судей головныхъ, кгдыжъ они в тыхъ справахъ судовыхъ местцо наше Господарское заседати будутъ. К тому о безѢпечное приѢханье тыхъ судовъ уставуемъ, ижъ коли бы хто якогожъ кольвекъ стану человѢкъ под тымъ часомъ, кгды суды головные отправованы будуть и передъ часомъ пpiexaнья судей головныхъ до того места, гдѢ зъѢханье судьями назначено, у двухъ недѢляхъ такъ же и по отъѢханью ихъ отътуль двухъ же неделяхъ, того, хто до судовъ головныхъ едеть албо приѢдетъ, будь на дорозе альбо в мѢстѢ на улицы гдѢ колвекъ подехавши и перенявши будь на господу и на кое становище кгвалтом нашедши, самого або слугу его и кого кольвекъ с таковыхъ забилъ або ранилъ будь тежъ толко шкоду якую вчинилъ: тогды таковый будучи очевисте черезъ возного зозваный въ такомъ обвиненю виненъ будетъ перед тымъ судомъ головнымъ без позву стороне жалобливой усправедливитись совито вине статутовой подлегаючи, ведже сторона жалобливая таковому обвиненому, гдѢ того потребовати будеть, жалобу свою на письмѢ под печатью своею через возного дати маеть, а обвинений потомъ третего дня о то, в чомь ему вину дадуть, усправедливитися будеть виненъ. А естли бы по сказанью черезъ вознаго нестановечыся ку росправѢ прочь съѢхалъ; тогды судъ головный кгвалтъ навязъки раны и шкоды чворако совито па таковом а будетъ выступокь кривавый, тогды и на горло его за доводомъ сказати а на выволанье до насъ Господара отослати маеть. А небудетъли очевисто пристигненъ а зазванъ; тогды за позваньемъ передъ судъ головный позвомъ на рокъ завитый на двѢ недели заочне и очевисте таковымъ жо способомъ яко выше описано поконыванъ, и отправа водлугъ артыкулу о отправахъ нижей постановленого па маетъности его за отосланьемъ отъ суду головнаго черезъ врядъ кгродскiй чинена быти маеть. А неоселый у Великомъ КнязствѢ Литовскомъ хто кольвекъ естли бы збытокъ гдѢ при бытности тыхъ судей якiй учынилъ; таковый, хотя бы и пана у ceбѢ менилъ, не допущаючы ему до него отозву тамъ заразомъ черезъ судъ головный моцно сужонъ и водлугь выступу своего сказыванъ и каранъ быти маеть, выимуючы то, естли бы што при бытности пана своего тамъ па томъ местцу альбо на дорозе учынилъ, тогды панъ его с него справедливость тамъ же заразомъ учынити повиненъ будетъ; а где бы справедливости учынити нехотелъ, тогды на самомъ пане такового слуги укривжоному за доводомъ в статуте описаннымъ сказанье обычаемъ въ арыкулѢ вышей помененомъ чынено быти маеть.

Часы назначоные судовъ головныхъ

Суды тыхъ воеводствъ и повѢтовъ вышей помененныхъ вжо за разомъ на первей в року осмъдесятъ второмъ початися и такъ завжды тымъ порядкомъ сужоны быти мають у двѢ недели по великодню у Вилни, а тамъ до того местца зо всихъ панствъ оного воеводъства Виленского и тежъ воеводства Полоцкого съ правами своими съѢхатись, и тамъ же судьи шесть недель у Вильни помешкати воеводства Виленского справы чотыри недѢли а потомъ воеводства Полоцкого двѢ недели судити маютъ. А по выйстью шести недель до Трокъ ехати и тамъ же вся повѢты оного воеводства судити шесть недѢль маютъ. А отъсудившы в Трокахъ недѢль шесть мають отъѢхати до Новагогородка, а тамъ становится маютъ по сконченью Троцкихь судовъ за двѢ недели, и судити дванадцать недѢль, то есть шесть недель справы воеводства Новгородского и повѢтовъ до него належачыхъ, а другую шесть недѢль воеводство Берестейское с повѢтомъ Пиньскимъ. А отсудивши тую дванадцать недѢль маютъ ехати до Менска, а тамъ становится по отъсуженью справъ Новгородскихъ за двѢ недѢли, а судити маютъ порядкомъ найпервей воеводъство Витебское Мстиславское и повѢты до нихъ належачые, а потомъ воеводство Менское и с поветами его такъ долго покуль вси справы отъсудятъ. А в Жомойти судьи головные обратные мають почати судити ажъ по сконченью судовъ Меньскихъ за двѢ недѢли. А тымъ судомъ головнымъ и часомъ ихъ назначонымъ сеймъ ани война таковая, которая ся не посполитымъ всей Речи Посполитой рушеньемъ але за пенези людми служебными отъправовати будеть, ничого шкодити и переказывати не маеть. Ведже под тымъ у иншихъ повѢтехъ суды земскiе кгродскiе такъ же и подкоморскiе сужоны и отправованы на роки и часы свои назначоные быти мають, выимуючы тыхъ которыхъ отъ войны констытуцiя соймовая вызволяетъ.

Часы на которые писары стороны для упоминанья (уписанья) справъ съеждчати винни

Писарь земскiй того воеводства, въ которомъ суды таковые припадати будуть, за три дни передъ часомъ заседанья до тыхъ судовъ на место назначоное приехать и до рейстру вси справы сторонъ вписати маеть, у которого въ тыхъ трехъ днехъ и потомъ по зачатью судовъ цалый тыждень кождыи тотъ, кому справа в томъ воеводств припадаеть, до рейстру вписовати справы свои могуть, а хтобы в томъ тыдню справы свои до рейстру вписати омешкалъ, такового справы потомъ тыдню писаръ до рейстру приймовати не повиненъ, лечъ то вжо до другого году отложити ся маетъ. А естьли бы судьи головные за меньшый часъ, нижли есть вышей назначонъ, справы зрейстрованые отсудили и листы судовые сторонамъ подавали и вовсемъ ихъ слушне отправили; тогды неждучы выштья часу вышей назначоного могутъ ся прочь з оного местца розъѢхати, ведже до Трохъ з Вильни а по выйштью шести недѢль до другихъ воеводствъ ку таковымъ судомъ назначонымъ предся ажъ тежъ по выштью сполного часу вышей замероного у двухъ недѢляхъ становится мають, а то для того абы кождый певную вѢдомость о приѢханью судей мети могъ.

Способъ выданья декретов судей головныхъ

Вси декреты оныхъ судей мають быти печатованы печатью земскою оного воеводства, гдѢся суды отправують, то естъ у Вильни печатью земскою Виленскою, а въ Трокахъ Троцкого, а в Новогородку Новгородскою печатью, а въ Менску печатью Менскою, до которыхъ листовъ судовыхъ судьи головные съ кождого воеводства по одной особѢ руки свое подписовати мають, такъ же и писары земскiе, которые тые справы у книги земскiе записывати будуть, мають подписовати рукою своею, а никому справъ не выдавати ажь за вѢдомостью судей головныхъ и прочитавши передъ ними.

Умоцненье деКретовъ судовъ головныхъ

Декреты выроки тыхъ судей всихъ мають быти такъ важъные яко наши Господарскiе на сойме учинены. А хто бы кольвекъ па декрете тыхъ судей не переставаючы по розсудку ихъ упорьне на съймъ альбо задворомъ передъ насъ Господара кого кольвекъ и якимъ кольвекъ обычаемъ ку скаженью такового декрету от судей головныхъ выданого позвалъ; тогды каждый таковый названый от позвовъ и отъ речей, хотя бы и не сталъ, за тымъ позвомъ албо мандатомъ пашимъ воленъ быти маетъ. А хтобы еще надъ то такъ упорнымъ быти хотелъ, а таковый позовъ попиралъ, або за нестаньемъ стороны што одержалъ; тогды таковое удержанье въ жадной владности не маеть и не можеть быти ку жадной шкоде и ни кому черезъ врядъ нашь отъправа чынена быти не маеть. А естли бы тежъ позваный передъ насъ Господара на таковый позовъ сталъ; тогды тотъ хто вызвалъ, повиненъ будеть самъ або прокураторъ его несходечы с права заплатите вины сто копъ грошей, которые вины половица стороне а дру (гая) половица до скарбу нашого быти маеть. А въ справѢ осужоной черезъ судьи головные, естли бы ся досытъ не стало, маеть быти отослано до вряду нашего приналежачаго, гдѢ виноватый оселость свою мети будеть, ку выконанью отправы речи сужоное, а над то прокураторъ таковый, который бы ся таковое речи черезъ судъ противъ тыхъ декретовъ поднялъ отъ кого попирати, маеть быти сказанъ до вежы на тыдень тамъ, гдѢ быся передъ нами таковая справа притрафила.

Повинность писара земского при судЪ головномъ

Писаръ земскiй оного воеводства, гдѢ таковые суды головные отправованы будуть, маеть и повиненъ будеть при тыхъ судехъ быти, а то для писованъя таковыхъ справь до книгъ земскихъ, а ведьже на тыхъ судехъ воту не маеть мѢти. А естли бы под тым часом отправованъя тыхъ судовъ головныхъ апеляцый иныхъ роки которые земскiе у вономъ повете припали; таковые роки земскiе абы не были сужоны, але по отсуженью правъ и судовъ головныхъ въ двухъ недѢляхъ за тымижъ позвы роки земскiе отъправованы быти мають, а ведьже то только разумѢтися маеть о тыхъ местьцахъ, гдѢ таковые судьи головные отправовати назначены, то есть у Вильни у Трокахъ у Новогородку и въ Меньску, у выншихъ воеводствахъ и поветах мають быти сужоны своимъ порядкомъ.

О позвехъ передъ тотъ судъ

Позвы передъ тотъ судъ мають быти подъ печатью оного воеводства або повѢту, гдѢ оселость свою маеть тотъ, кого позывають, гдѢ тую справу передъ судомъ земскимъ або кгродскимъ зачалъ. А рокъ завитый вшелякимъ позвомь быти маеть передъ часомъ на суды головные верху означоные очевисто за чотыри недели, а заочне на именью позвы покладаючи за шесть недель а неближей, выймуючи толко тые артыкулы, которые для прудшое справедливости рокъ позпозванью двѢ недѢли вышей естъ описанъ.

О записехъ и протестацыяхъ

Записи осветченья и сознанья всякихъ листовъ записовъ и сознанья возныхъ вшелякiе такъ мають быти важны перед тылъ судом учинены яко передъ нами Господаремъ або передъ судомъ земскимъ.

Отправа таковыхъ судовъ въ речахъ осужоныхъ

Судьи тые головные кгды которую справу за апеляцыею або запозвы и на якомъ кольвекъ року отъсудять и што стороне жалобной присудить; тогды при сказанью своемъ положивши на сторону противную заруки по три кроть такъ много, яко речи самое скажуть. А гдѢ бы увязанье и отъправы вряду по томъ ихъ сказанью не поступилъ; мають на увязанье и отправу речи осужоное заразомъ на томъ же листе своемъ судовом того докладаючы отослати до пана воеводы або старосты, а въ не бытности ихъ самихъ ино наместъникомь ихъ тая справа отправовати належати будеть въ речахъ кгродскихъ, а въ речахъ суду земскому належачыхъ до суду земскаго оного местца, въ которомъ повѢте тая справа — первей передъ судомъ земскимъ або кгродскимъ або подъкоморскимъ початокъ свой мела. А врядъ нашъ земскiй або кгродскiй которому то с тыхъ врядовъ за отосланьемъ будеть належать, таковымъ обычаемъ заховатися будетъ повиненъ, то есть гдѢ бы ся таковая справа приточила, въ которые роки статутовые заплате сумы пенезей отъ суду головнаго будутъ зложоны, тогды скоро первая рата заплате сумы пенезей якоежъ кольвекъ выйдетъ, маеть тотъ врядъ за тую суму пенезей, которой рокъ минетъ, потомужъ и по выйштью иншихъ рать по каждой рате, албо поколку ихъ, яко того сторона и жалобная по вряде потребовать будеть, з врадникомъ земскимъ судья або подсудокъ а кгродскiй воевода староста або наместникъ ихъ заразомъ скоро взявши о томъ ведомость, надалей до чотырохъ недѢль ведлугъ сказанья судей головныхъ порядкомъ и шацункомъ в статуте описанымъ на именью виновитаго, то есть на людехъ и кгрунтехъ всякихъ, а въ недостатку людей и кгрунтовъ и дворъ самый шацункомъ слушнымъ и во вси добра оного двора имѢнья увязенье моцное и отъправу учинитъ. А гдѢ бы которая сума пенезей без складанья роковъ статутовыхъ отъ суду головнаго на комъ была взыскана; тогды скоро по принесенью оное справы тотъ врядъ, до которого то отослано будеть, такъже на далѢй до чотырохъ недель маеть отправу вчинити порядкомъ вышей описаннымъ. А при кождой таковой отправѢ врядъ кождый маеть при собѢ мѢти пяти шляхтичовъ у Великомъ КцязствѢ Литовъскомъ оселыхъ, людей добрыхъ ни в чомъ неподойзреныхъ, а возныхъ двухъ тогожъ повету, въ которомъ ся то деѢти будеть, о которую шляхту сторона поводовая сама старатися и набывати ихъ маеть, а за працу тому вряду самому, который отправу чыпити будетъ, увяжчого от копы по шести грошей тотъ, на комъ отправу чинятъ, платите маеть; а кгды придетъ увязывать у властное именье стороны жалобливое правомъ презысканое албо въ люди и кгрунты, тогды сторона поводовая увяжчого вряду отъ службы або отъ волоки оселое людьми по шести грошей а от пустое пашное земли або волоки по два гроши платите маеть, а отъ иншихъ кгрунтовъ ничего платите небудеть винна. Тую отправу врядъ в томъ часе вышей замерономъ выконывати маеть под виною стома копами грошей на судъ головный, которую вину врядъ тотъ, который бы отправы вчинити нехотелъ, до тыхъ же головныхъ судей позванъ быти маеть. А естли бы сторона тая, на комь врядъ земскiй къгродскiй або подъкоморскiй отправу вчинити всхочеть, тому вряду нашому отправы вчинити на именью своемъ не допустилъ и чымъ кольвекъ спротивился; тогды тотъ врядъ, которому быся спротивено, до насъ Господара на листе своемъ отворономъ подъ печатью своею и подъ печатями тыхъ шляхтичовъ и возныхъ к тому и съ подписаньемъ рукъ ихъ, хто з нихъ писати мѢти будеть, отослати и о томъ упоре ознаймити намъ маеть; а мы Господарь на тотъ часъ, гдѢ дворомь нашимъ будемъ, таковаго упорного и вряду нашого непослушного казать выволать с панствъ нашихъ, а на именью противного чрезъ дворянина нашого укривжоному моцную отправу вдѢлати разсказати за разомъ кром вшелякое проволоки, такъ въ речи осужоной яко и въ зарукахь закладахъ у винахъ и в шкодахъ всихъ, маемъ и повинни будемъ, который дворянинъ при таковой отъправе пяти тежъ шляхтичовъ и двухъ возныхъ при собѢ мѢти маетъ. А за тую вину и противенье праву посполитому и звирхности нашой господарской остатокъ маетъности противного, што бы кольвекъ его у Великомъ КнязствѢ Литовскомъ остало, вся отъ мала до велика лежачую до столу нашего Гостодарского взяти и привернути маемъ, которую вжо тотъ истый таковый спротивникъ вѢчнѢ тратити повиненъ будеть, и всю мы Господаръ тую маетность раздавати моцни и вольни будемъ людемъ народа шляхетского намъ и Речы Посполитой заслужонымъ яко властные спадки свои, а тому выволанцу не ворочаючы, вынявши то естли бы таковый стороне укривъжоной за вси презыски досытъ учинилъ, а до насъ Господара о милосердье бы ся утекъ, тогды приверненье ему оное маетности и внесенье з него оного выволанья будеть при воли и ласце нашой господарской. А естли бы тотъ же такъ упорный былъ, и тому посланьцу нашому спротивился и отъправы вдѢлати не допустилъ, або тое именье уникаючы права кому иному в руки пустилъ, чого водлугъ артыкулу на сойме коронацыи Короля Генрика фаленого учинити не могъ: таковаго противника справедливости божое и зверхности маестату нашого Господарского за припозваньемь от стороны укривьжоное передъ насъ Господара маньдатомъ на рокъ завитый и по отказанью па письмѢ того упору и непослушенства сознаниемъ посланца нашого шляхты и возныхъ при нень будучыхъ, тамъ гдѢ на тотъ часъ дворомъ нашимъ будемъ, в жадную лимитацию невпущаючы, кгды позваный станетъ, горломъ его карати кажемъ, а естьли нестанеть, тогды па сойме по той справе первей за тымъ же манъдатомъ чти отъсудити и на горло его сказати маемъ, а поступокъ весь отправы стороне жалобной и приверненье маетности упорънаго до столу нашого Господарского неоткладаючы до сойму але заромъ на року за манъдатомъ припалымъ такъ яко вышей описано черезъ посланца нашого выконати мы Господарь безъ кождое проволоки повинни будемъ. А естли бы тотъ, кому именье по заложенью на немъ позвовъ пущоно, у везанье боронилъ; тогды сторона жалобливая такового на рокъ завитый заочно за шесть недѢль а очевисто за чотыри недѢли до суду головного припозвати маеть, и гды на него того спротивенья свядецствомъ врядовымъ яко вышей описано доведетъ, тогды увезанье у оное имѢнье за речь осужоную поступити, а к тому кгвалтъ заруки вълисте судовомъ описаные з навязкою самъ заплатити повиненъ будетъ, што на властной маетъности его безъ складанья роковъ статутовыхъ сказана и отправа порядкомъ вышей противъ самого истца описанымъ учинена быти маеть. А то се маеть розумети коли бы хто оселый у Великомъ Квязстве Литовскомъ тое учинилъ, а гды бы тотъ который увезанья боронилъ у Великомъ Князстве Литовскомъ былъ неоселый а увезанья боронилъ моцно; тогды самый истецъ поступъкомъ вышей описанымъ во всемъ поконыванъ быти маеть, а о томъ неоселымъ противнику одномъ або колько ихъ будетъ яко и о самомъ истцу врядъ нам Господару ознаймити маеть, а мы тыхъ противников посполу с самым истцомъ съ земли всихъ панствъ нашихъ выволати разсказати маем. А ижъ бы жаденъ того ся важыть а такового именья под обороню свою брати ани тежъ съ таковымъ выволанцомъ обцованья жадного мѢти и въ дому своемъ переховывати ихъ не смелъ; про то уставуемь, гдѢ бы хто якогожъ кольвекъ стану чоловѢкъ отъ нижних ажъ до наивышъшого не выймуючы с того жадное особы, вѢдаючы о таковомъ переводѢ права противнаго и по обволанью таковаго декрету въ томъ повете, гдѢ оный выволаный оселость маеть, обѢцованье з нимъ мѢлъ або его въ дому и наименью своемъ по декрете нашомъ Господаръскомъ переховалъ, таковый будучи передъ судомъ головнымъ припозваный на завитый рокъ, гдѢ бы ся невѢдомостью о декрете нашомъ вымолвлялъ або до переховыванья незнался, тогды незгода але присегою отъведшися будетъ отъ того воленъ, а естли бы присегнути не хотелъ, тогды горломъ каранъ быти маеть. А пакъ ли бы кому придалося таковаго выволанца забити; тогда тотъ, хто его забьетъ, головщины платити, и ни которые вины за то на ceбе поносити не маеть.