Таза ойлор Так сөздөр

Жаңы ойлордун агымы ден соолукту кантип чыңдайт?

Эми кайрадан денеге көңүл буруп өзүңө өзүң: Тынчтан! Тынчтан! Тынчтан! Мен адашууга , кемчилик кетирүүгө акылуумун! Бул менин турмуштук тажрыйбам. Мен өзүмдү өзүм кечирдим! Баардыгына ыраазымын! Тынчтан! Тынчтан! Тынчтан!. Булчуңдарым жазыл. Денем бош бол!. Бир азга эс алуу керек. Бул – энергия. “Коркунуч” – бул ой менен келген энергия.

Денени бош койгондо энергия (коркунуч) денеде токтобостон акырын сыртка чыгып кетет. Бул ар бир адам үчүн турмуштук тажрыйба! Болгону маалыматты кабыл алып өз убагында кое берүүнү үйрөнүү сөзсүз керек.

Мындан ары кандай сезим келсе ошол сезим менен өз убагында иштеп койсо ар бир адам үчүн “өзү менен өзү иштөө жеңил жана оңой боло баштайт. Ар бир адамдын “жаны” өзү түзгөн туткундан өзүн бошотууга аракет жасайт.

Демек, бул китепти окуп жаткан адамдын “жаны – боштондукту каалаган жан” ошон үчүн жашоонун “тартылуу күчү” менен тартылып ушул саптарды окуп таанышууда. Ал үчүн, өзүңө өзүң ыраазы бол. Сен изденген, өнүгүүнүн жолундагы адамсың.

Ар бир адам бул жашоого турмуштан тарбия сабак алуу үчүн келет. Жашоону үйрөнүп, өзүндө болгон нерсени эстеп, аны пайдаланып, өркүндөтүү үчүн келет. Ошон үчүн өзүңө өзүң жаңылышууга, турмуштан ар кандай тарбия алууга уруксаат бер! “Жаңылбас жаак, мүдүрүлбөс туяк болбойт” дегендей, жаңылышуу менен, өүбүзгө болгон ишенимди бекемдейбиз, жашоодон тарбия алып такшалабыз.

Эми, кайрадан жогорудагы мисалдагы апанын сезимин түшүнөлү.

АПА: баланын апасы “ кыжалатчылыктын толкунунун”, энергиясына уланды, “күмөнсүрөөсү” күчөдү, жүрөгүндө бейкутсуздук пайда болду, кыжыры келе баштады. Кан басымы жогорулады. Жаман ойлор келген сайын жүрөгү кысыла баштады. Эмчегинде сезгенүү пайда болду. Жатынын кан тамырлары кысылып, эмчектин каналдарына зырп – зырп этип сигнал берип, сүтү ачуу болуп, ууга айлана баштады. Баланын эмчек эмбөөсүнө алгачкы шарт түзүлдү. Ал деген баланын иммунитетин начарлатып, ден соолугун , айрыкча эске тутуусун начарлатты.

Жатынына ар кандай ооруулардын пайда болушуна шарт түзүлдү жана ар кандай ооруулардын пайда болушуна, үрөн себилди. Өзүнө болгон “ишенимдин жоктугу” омуртканын начарлашына алып келет. Ал деген, үй-бүлөнүн туруксуздугуна б.а. бузулушуна алып келиши мүмкүн.

Эне менен кыздын ортосундагы мамиленин бузулушу – бул аялдык касиетин кармана албаганы б. а. өзүн-өзү сүйбөгөндүгү. Кайын эне менен келиндин касташы – бул “ар бир аялдын өзүн өзү кабыл албоосу», “өзүнүн көлөкөсү менен өзүнүн урушуусу, өзү менен өзүнүн атаандашуусу”. Ар бир адам сенин ички дүйнөңдү сыртыңдан күзгү сыяктуу көрсөткөн, өзүңдүн кандай адам экендигиңди чагылдырган адам. Ошентип, кимдин дүйнөсүндө сен кандай адамсың өзүңдү ачык көрө баштайсың.Албетте, сен жөнүндөгү ой пикири жаман адамдын алдында өзүңдү жаман сезип, кыйнала баштагандан кийин ал адамдан алыстоого туура келет. Аны интуиция менен сезесиң.

Аял менен аялдын же эркек менен эркектин бири – бири менен келишпестиги денесинин бир капталынын б.а. дененин жарым бөлүгүнүн жакбыркашы болуп эсептелет. Сырткы дүйнөдө эки аял бири– бири менен касташса, урушса, ички дүйнөдө ар бир аял өз денесин өзү экиге бөлөт. Өзү менен өзү урушуп, дененин “оң тарабы” менен “ сол тарабынын” бири – бири менен энергетикалык байланышы начарлап, белден өйдө жагы менен төмөн жагы бири – бирине болгон байланышы начарлап буту колдун оорушу, жатындын, белдин оорушу күчөйт. Бири-бирине болгон тирелишүү күчөйт. Ошон үчүн эки аял бир үйдө жаңжал салууга жөндөмдүү.

Жамбаштагы нур каналдарынын иштеши начарлап, жашы кырктан өткөндөн кийин кээ бир адам, айрыкча өзүн караганды билбеген адамдар “аксап” белине колун таянып, илең – салаң, араң, буту менен чарпып, аксап басат же, “карылык келди”, же “нервден ооруп калдым” деген шылтоо менен көзүнүн жашын көлдөтүп “параличти сыйлап” төшөктөн турбай жатууга аргасыз болот.

Ар бир эне, аял заты өзүң танда. Бул көрнүнүш учурунда билинбегени менен ушундай болуп калышы да мүмкүн. Эми бир аз да болсо түшүнүктүү болду го дейм. Ар кимге ден соолук “өзүнө” кана керек. Ошон үчүн “учур чакта” жашап, ойду тандаганды үйрөнүү зарыл. Ал эми ой, сезимге уланып денеге келген энергиянын сапаты ошого жараша болот, албетте андан ден соолук келип чыгат.

Кыймыл аракет, эергия, ой,сөз, сезим, тамак аш, мамиле, таза аба, жыйынтыгы келип баардыгы – ден соолукту түзөт.

Ар тараптуу мамиленин бузулушу – бул, бир эле үй бүлөдөгү аялдардын көрүнүшү эмес, бул деген бүткүл аял – эркек ортосундагы мамиленин бузулушу, эне менен баланын мамилесинин бузулушу, дүйнө, Аалам менен дененин байланышынын бузулушу, дененин экиге бөлүнүшү.

Маалымат бир эле адамдын денеси аркылуу бүткүл дүйнөгө тарайт, себеби, адам денеси нур толкундары аркылуу өзүнөн акыбалын дүйнөгө чачыратат.

Кимге “ден соолук керек болсо”, ойлонуп көргүлө.

Жазылган сөздөрдүн мааниси “өтө терең”, кайра – кайра окуп чыгууну сунуш этем. Себеби, улам кайталап окуганда капустанын кабатын сыйрыган сыяктуу, башка окуянын сыры ачылат, аны түшүнүү менен сен өзүңдү өзүң түзгөн тоскоолдуктардан бошотосуң. Коркунучтарың, жалган ишенимдериң кетет. Ал деген нерсе булчуңдарды бошотуп, ден соолукта болууга шарт түзөт. Канчалык булчуңдар жазылган сайын, кан айлануу жакшырат, кан айлануу жакшырса, нур айлануу калыбына келет, клеткалардын жаңыланышы тездейт.

Мына ушундай тартипте түшүндүрүү жүргүзүлө бермекчи. Эми, мындан ары ден соолуктун башаты кайдан келип жаткандыгына көңүл бөлүп түшүнүүгө аракеттенсеңер.

“Ан сезим” менен түшүнүү деген сөздү кандайча түшүнсө болот?

Ал деген адам канчалык көп окуган сайын ар кандай окуялар эске түшүп, өзүңдүн кетирген кемчилигиңди өзүн көрүп, эми кандай кылып жашасам деген жыйынтык келип чыгат, б.а. ушул күнгө чейин аткарылбай келген нерсени, өзүңдүн кана “оюңдун энергиясын” өзүң каалаган нукка буруу менен чечилип кетээрине шарт түзөт. Бир сөздү, экинчи сөз менен алмаштырып ойлоо, сүйлөө тосулган жолдун ачылышына себепкер болот. Же болбосо баардыгына макул болуп, “эмне болсо ошол болсун” деген нейтралдуу “чечим” – энергиянын тосулган тосмосун ачат да жол суу жуугандай эле агылып келип, жуулуп сыртка чыгып кетет.

Бул нерсе ар бир эле адам турмушунда болуп келе жатат. Болгону бул, “жашоонун техникасы” кантип иштээри жөнүндө көңүл бурган эмесбиз. Ошондуктан, ар бир болуп жаткан окуя, ар бир адамдын өзүнүн турмушундагы жасаган ишкердиги, мүмкүнчүлүгү, чыгармачылыгы, тажрыйбасы.

Мына, жогорудагыдай кичинекей турмуштан алган “бир үзүм” көрүнүштүн таасири тагдырдын, ден соолуктун бузулушуна кандай таасирин тийгизип жатат. Ал эми буга окшогон көрүнүш ар бир секундада, саат сайын сансыз эле болуп жатпайбы. Ал көрүнүштү, жашоону өзгөртсө болобу? Болот!

Азыр кичинекей бир көнүгүү жасайлы:

Ар кандай жаман ой келе баштаганда, дем алып, дем чыгар бир канча жолу. 7 жолудан ашык. Андан кийин башты көтөрүп адамдарды, жаратылышты, асманды жана башкаларды кара. Ой, көңүл башка жакка бурулду. Башты жерге салып, жер карай берген адамдан эч убакта жаман ой кетпейт. Бекеринен “жер караган адамдан түңүл” деген сөз айтылган эмес. Себеби, жерди караганда мээнин нур айлануу алкагы төмөнкү алкакта болуп, жаман ойлордун агымы көбөйөт. Ошон үчүн жашоонун шаңдуу болуусун кааласаң, элди, жерди көрүп, бактылуу жашагың келсе, башыңды өйдө көтөр, көкүрөктү сүйүнүчкө толтур. Акылман адамдар айткандай “Көктү карап алдыга умтул”. Көңүлдү алаксытып, жок дегенде бирөөлөр менен сүйлөш, каалаган жумушуңду жасап алаксы. “Каалаганың эмне”, ошону тап, да көңүлүңдү сени сүйүнтө түрган, кубандырган нерсеге бур. Күчүңдү, ден соолугуңду, энергияңды ошол тарапка бур.

Эскертүү: Каалоо башкаларга зыяны тийбей турган болсун. Каалоону өзүңө кана каала. Себеби, өзүң жөнөткөн нерсенин ээси өзүңсүн жана жыйынтыгын өзүң кана аласың.

Ал эми өтүп кеткен нерсени болсо сезим менен кайра ойлонуп, жаман сезимди жакшы жагына буруп алса боло турган жолдор бар. Баардык болгон окуяны, көңүлүңө жакпаса “ой” менен кайра артка кайтып “сезимдин жакшырышына” чейин, ой менен ойлоп, төмөнкү сөздөргө окшогон ойлорду ойлоп, өзүң каалагандай кайрадан окуяны элестетип оңдоп койсо болот. Себеби, өткөн жашоо, элес жашоо, кинонун кадры сыяктуу сакталып калат. Аны карйрадан өзүңө жаккандай кылып сезим менен сезип өзгөртүп койсо, кийинки жашоого, ден соолукка зыянын тийгизбейт. Жаман ойлогондо кыйналган сезим жакшыра баштайт.

Убакыт бир линияда, бир багытта өткөн чак, учур чак, келер чак баардыгы азыр, ушул жерде. Сезим өзгөрдү, кыжаалатчылык кетти, ден соолук чыңдалды, жашоо өзгөрдү жакшы жагына өттү. Болгону, “тазалануу”, “кайрадан жартуу”, “программаны өзгөртүү” ар бир адамдын иш аракетине, чеберчилигине, түшүнүгүнө жараша жүрөт.

Азыр жогоруда келтирилген терс мүнөздөгү мисалды, оң жагына буруп түшүнүп көрөлү. Эми, “апа” кандайча ойлосо болмок?

Мисалы, апанын жаңы ою:

Менин баламдын дени сак. Күчтүү. Тамакты өз убагында жейт. Чоң энеси өз убагында тамагын берип эшикке алып чыгып таза абада сейилдетет. Кайненемдин ден соолугу чың, эске тутуусу жакшы. Мен ага ишенем, себеби, менден жакшы карайт. Кечинде жолдошум экөөбүздү жумуштан барганда күлүп жайнап тосуп алышат. Биздин үй – бүлө бактылуу! Мен аларды сүйөм! Мен кандай бактылуумун! Жашоом мен калагандай болуп жатат! – деп ойлосо, өзүн кандай сезет?

Ушул ойду “сезим” менен иштеп көргүлөчү. Күнүмдүк жашоодо болуп жаткан ар кандай шартты өзүңөр жакшы сезимге келгендей кылып кайрадан сезим менен иштеп көрүп кана тажрыйба топтойсуңар. Тажрыйба жылдар менен бекемделет, өмүр өтүп, келечекке тагдыр түзүлөт. Аны дайыма жасап, керектүү жерде керектүүсүн жагымдуу кылып пайдалан.

БАЛА: Бала жөнүндө жакшы ойлогон убакта балага көзгө көрүнбөгөн нур толкуну аркылуу эненин “сүйүү , мээр төгүүсү заматта жетип, аны бала сезими менен сезип, денеси чыйралып, өзүн жакшы сезип, чоң энесине мени көтөр деп эки колун созуп умтулат”.

Апанын таза ою баланын сезимине жылуулук тартуулап, бала өзүн апасы жанында тургандай сезди. Ал эми "апанын – нур денеси» заматта баланын жанында болуп сүйүү нурун чачыратып турат. Ар бир адам физикалык денеден сырткары бир канча денеден турат. (Ал денелер жөнүндө китептин “дене түзүлүш жөнүндө” деген темасынан баштап түшүнүк ала баштайсыңар )

Эми бала чыйралып, денеси бекемделди.

Апа– баласына ишеничтин күчүн жөнөттү, ою менен баласына төмөндөгүдөй сөздөрдү айтты:” Менин балам дени сак. Күчтүү! Тамакты жеп, азыр чоң энеси менен эшикке чыгып келип таза абадан дем алып, таттуу уйкуда жатат” – деп ойлосо. Апа баланын тамак жешине шарт түзөт. Таза энергия балага күч берип, аппетитин ачып тамак жегиси келип, чоң энеси берген тамакты тамшанып жеп, эшиккте чоң энеси менен сейилдеп жүрүп мемиреп уйкуга кетет.

Эми, баланын “омурткасы бекемделип”, көңүлү ачылды, эркин чоңоюшуна шарт түзүлдү. Денесине кирүүчү ток өткөргүч нур каналдары аркылуу тиешелүү нурлар баланын денесине эркин кирип, баланын денесин күч кубат менен заряддайт, денеси мээр, сүйүү нуру менен тамактана баштады. Наристеде коркунучтун нуру токтоп, мемиреген тынчтык, бейкутчулук нуру кан тамырлар аркылуу бүткүл денесине тарай баштады.

Апанын таза ойлору баланын келечегинде өз алдынча, бактылуу жашоосуна шарт түздү. Баланын дене түзүлүшү өзү жаш болсо да “жаратуу касиетине ээ”. Ар бир наристе төрөлгөндөн 12 жашка чейин өз тагдырын өзү түзөт. Ошондуктан, ар бир ата – эне балам бактылуу, ден соолукта болсун десең, наристелер жаш кезинде дайыма чогуу жашап, өзүңөр багып чоңойтуп, балдардын өсүп өнүгүшүнө, келечегине шарт түзгүлө. Ажырашып кетпей, үй бүлөнү сактап жашоо ар бир баланын келечегине чоң салым кошуу болуп эсептелет. Наристелер, психологиялык жактан ден соолукта болуусу үчүн балдардын алдында урушуп, талашууну көрсөтпөгөнгө аракет кылуу керек. Аларды ашыкча башкарууну, токтотуп, баланын каалаганын өзү жасап үйрөнүүсүнө шарт түзүп берүү чоң жардам болот. Эмгек кылууга үйрөтүү баланын келечекте өз турмушун өзү алып кетүүсүнө үрөн себүү болуп эсептелет. Ошон үчүн эмгектенүүгө үйрөткүлө. Себеби, азыркы жашоодон тажрыйба топтоосу керек, жеңил жана оңой керектүү нерсени өзү жасоону үйрөнүүсү зарыл.

Ал эми кыздардын, аялдардын “баланы өзүм үчүн төрөйм” деген ою эн чоң кемчилик экендигин психология боюнча, адам тагдыры кандайча жаралаары жөнүндө түшүнүк алгандан кийин, андай жашоо жаш балага канчалаган “нервдик стрессти” алып келип, баланын “депрессия” менен оорушуна, “жан дүйнөсүнө кыжаалатчылык алып келип, “тагдырына” кандай таасирин тийгизээрин түшүндүм. Албетте, андай тагдырды ар бир аял өз башынан өткөргөндөн кийин өзү кана түшүнөт жана убакыт өткөн сайын өзүнүн кетирген кемчилигин өзү көрүп, талдап көрөөр.

ЧОҢ ЭНЕ: Чоң эне келинин оюн сезип, мээр төгүүсүн кабыл алып, жүрөгүндө сүйүнүч менен денесине күч кубат алды. Менин неберем бар, аны өз убагында тамак берип, ойнотушум керек деген “энелик инстинкти” ойгонду. Чоң эненин денеси чыйралды. Кан басымы нормага келди. Дене активдүү иштөөгө киришти.

Омурткасы аркылуу жашоонун нуру агыла баштады. Бели бекемделди. Эне кайратына кирди. Мээр төгүп баланы кароого кызыгуусу пайда болду. Жаңы жер тартып алсыраганы токтоп, ордунан туруп небереси жаткан жерге барып, баланы колуна алды.Небереге жакшы сөздөрүн айтып эркелете баштады. Баланы тамактандырды, коляскасына салып алып эшикке чыгып таза абада сейилдөөгө кетти. Кемпир өзүнүн “сезимин” өзгөртүү менен өзүнүн жашоосун, өмүрүн узартууга шарт түздү, өзүнүн урпактарына күч кубат берип, узак, бактылуу жашоого чыйыр салды.

Келинине ыраазылык билдирди. Бактылуу болуусун ниет кылды. Өзүнүн урпактарына сезими сенен “мураска – мен бактылуу – энемин!” – деген “маалымат” калтырды. Информациялык (маалымат), энергетикалык талаасында, эне менен баланын отросундагы мамиле чыңдалып урпактарынын ден соолугу чың болуп, бактылуу жашашына шарт түзүлдү. Ал тагдыр китебине өзгөртүлүп жазылды. Эми, финансылык байлык, материалдык байлык, урпактардын бай, бакубат жашоосуна өбөлгө түзүлдү. Ал деген денедеги чың ден соолук, бактылуу, жетишкен жашоодо жашоо.

Бир эненин ден соолугу, бактысы – бүткүл дүйнөдөгү энелердин ден соолугу, бактылуулугу, Жер Эненин бактылуулугу, Ааламдын бактылуулугу.

Бир адамдан бүт Ааламга “ сезим” менен нур аркылуу мааалымат таркайт, ошентип дүйнө түзүлөт, турмуш курулат, тагдыр жаралат.

АПА: Баланын апасы өзүнү оюн жашоонун оң нугуна буруу менен “өзү” күчкө толду, ишеними күчөдү.

Иштеп жаткан жумушуна кызыгуусу артты. Денесинде кан айлануу нормага келип, активдүү иштөөгө киришти.

Мүчө башы чыйралып, омурткасы көтөрүлүп басканы нормага келип калыптанды. Дем алуусу калыптанды. Жүрөгү тынчтанды, коопсуздануусу токтоду. Коркунучу кетип, мээнин кан айлануусу калыптана баштады. Мээсинин иштеши активдештирилип, эске тутуусу калыптанды. Желкесинин уюганы тарады. Көзүнүн көрүүсү жакшырды. Колу жумуш жасоого шамдагай болду. Денеси чыйралып, ишеними көчөдү.

Эмчектеги сүтүнүн ачуусу кетип, зырылдап ооруганы токтоду. Жатынынын ооруганы басылды.

Денесинин сол тарабы күч кубатына кирди. Мээсинин оң жарым тарабы активдүү иштей баштады. Өзүн – дененин сол тараптан паралич болуу ооруусунан сактады. Эми, чоң энеге, аял затына ишенүүсү өзүнүн денесинин сол тарабына ишенүүсү. Бул, деген баардык аял затына , үй бүлөсүнө, тууган уругуна, айылына, мамлекетине ишенүүсү. Алла Талаага ишенүүсү.

Баласына ишенүүсү денесинин оң тарабына ишенүүсү, ал деген өзүнүн денесинин оң тарабынын, денедеги эркек энергиясынын айлануусунун нормага келүүсү. Кан басымынын өз нугунда иштеши. Боорунун тазаланып, өттүн, бөйрөктүн жакшы иштешине шарт түзүшү. Эки бөйрөктүн бир нугта иштөөсүнө күч кубат берүү. Эркек адамзаты менен мамлиленин калыптануусу.

Көрдүңөрбү бир “ойдон” – канча тагдыр өзгөрөт, турмуш курулат, ден соолук чыңдалат, келечек жашоо курулат. Ал эми ой башка нерселер менен да өтө тыгыз байланышта. Өзүңө, ата-энеңе, бир туугандарыңа, жолдошуңа, айлана чөйрөңө болгон мээримдүү мамилең – бул өзүңдү өзүң сыйлоо, баалоо, ден соолукта болуу деген сөз. Ошентип, жашоодогу баардык нерсе бири-бири менен өтө тыгыз байланышта.

–

Мураска эмне калат?